Tuttugu MD-80 þotum frá AA flogið í eyðimörkina á einu bretti

- Mesti fjöldi flugvéla sem flugfélag hefur losað sig við á einum degi

26. ágúst 2016

|

Frétt skrifuð kl. 15:17

American Airlines hafði yfir 360 stykki af McDonnel Douglas MD-80 þotunum í flotanum þegar mest var

Ekkert flugfélag hefur losað sig við eins margar flugvélar úr flota sínum á einu bretti á það á einum degi eins og American Airlines sem tók sl. þriðjudag tuttugu McDonnell Douglas MD-80 þotur úr flotanum en félagið mun ekki nota vélarnar meira þar sem þær eru komnar til ára sinna.

Þetta er mesta magn af flugvélum sem flugfélag hefur losað sig við á einum degi en flest flugfélög hafa yfirleitt tekið eina og eina úr umferð um leið og ein ný bætist í flotann til að viðhalda sama flugvélafjölda.

MD-80 vélunum tuttugu var flogið til Roswell flugvélakirkjugarðsins frá 20 mismunandi áfangastöðum í Bandaríkjunum sem eru Tampa, Fort Lauderdale, Raleigh/Durham, Philadelphia, Pittsburgh, Chicago, Nashville, Houston, Dallas, Tucson, Phoenix, Las Vegas, San Bernardino, Colorado Springs, Salt Lake City og Minneapolis.

Vélarnar komu allar saman á Roswell þar sem þær bíða örlaga sinna en ef vélarnar munu ekki seljast og fá nýja eigendur verða þær rifnar niður í brotajárn.

McDonnell Douglas MD-80 þota lendir í Roswell í Nýju-Mexíkó sl. þriðjudag

American Airlines hafði í júní 87 McDonnell Douglas MD-82 og MD-83 þotur í flotanum en félagið ætlar sér að vera búið að fækka þeim niður í 52 stykki fyrir lok ársins og verða því 14 vélar til viðbótar teknar úr umferð í haust.

American Airlines ætlaði að vera búið að losa sig við allar MD-80 þoturnar fyrir árið 2018 en félagið gerir ráð fyrir að þeim verði flogið a.m.k. út sumarið 2018.

MD-80 vélarnar á Flightradar24 á leiðinni í eyðimörkina allar á sama tíma

MD-80 þoturnar hafa verið í flota American Airlines í þrjá áratugi en félagið fékk fyrstu þotuna afhenta þann 4. maí árið 1983 en ári síðar pantaði American Airlines 67 eintök af McDonnell Douglas þotunum með möguleika á 100 til viðbótar.

Vélarnar voru lengi öflugustu vinnuhestarnir í innanlandsflugi American Airlines og lögðu vélarnar undir sig Dallas-Fort Worth flugvöllinn í Texas á níunda og tíunda áratug síðustu aldar.

American hafði stærsta MD-80 flota heims á sínum tíma en þegar mest var hafði félagið yfir 360 eintök af þessari flugvélategund árið 2002 en American Airlines hefur verið að skipta MD-80 vélunum út fyrir nýjar Boeing 737-800 þotur auk Airbus A320 véla.

MD-80 vélarnar 20 komnar saman í Roswell





Al Matter, flugstjóri, og Robert Cornelius, aðstoðarflugmaður, flugu einni af vélunum 20 til Roswell