Miklar líkur á að þjóðin muni kjósa flugvöllinn áfram í Vatnsmýrinni

- Ögmundur: Þjóðin á að fá að kjósa um framtíð flugvallarins

30. ágúst 2016

|

Frétt skrifuð kl. 21:47

Frá Reykjavíkurflugvelli fyrr í sumar

Lögð hefur verið fram tillaga á Alþingi um að haldin verði þjóðaratkvæðagreiðsla um framtíð Reykjavíkurflugvallar og lagt til að þjóðin muni kjósa um hvort það sé vilji hennar að Reykjavíkurflugvöllur verði áfram í Vatnsmýrinni eður ei.

„Það sem er engu að síður mikilvægt við þetta mál er fjöldi þeirra þingmanna sem flytja þetta mál sem eru alls 25 talsins og þá er mun fleiri sem eru fylgjandi málinu og þar á meðal ráðherrar í ríkisstjórn og fleiri þingmenn þannig það er allt sem bendir til þess að meiri hluti þingsins sé hlynntur þjóðaratkvæðakosningu“, segir Ögmundur Jónasson, þingmaður Vinstri Grænna, í samtali við Alltumflug.is.

Ögmundur telur að flest bendi til þess að tillaga um kosningu um framtíð Reykjavíkurflugvallar verði samþykkt ef hún fer fyrir atkvæðagreiðslu á Alþingi.

„Hið mikilvæga í þessu er að meirihluti Alþingis telur að þetta mál eigi erindi til þjóðarinnar í þjóðaratkvæðagreiðslu og nú er það samt svo komið að það er orðið of seint að hægt sé kjósa samhliða alþingiskosningunum í haust“, segir Ögmundur.

„Engu að síður er þetta samt vísbending um hvað koma skal þar sem mér finnst mjög líklegt að málinu verði fylgt eftir síðar í haust. Þetta verður að koma til umræðu áður en þingi verði slitið. Það er tími til þess að afgreiða málið sem viljayfirlýsingu á Alþingi.“, segir Ögmundur.

Ögmundur Jónasson

Ögmundur segir hæpið að hægt verði að láta þjóðin kjósa um framtíð flugvallarins í haust en bendir á að hægt verði að fá fram vilja þingsins til málsins en annars myndi það bíða næsta þings að ákveða dagsetningu á þjóðaratkvæðagreiðslu.

Þetta er mjög stórt mál sem varðar hagsmuni landsmanna allra og þjóðarhag og væri ekkert eðlilegra en að efna til sérstakrar þjóðaratvæðagreiðslu um þetta mál og gæti því alveg komið til þess að haldnar verði sérstakar kosningar um Reykjavíkurflugvöll.

Borgin hefur ekki komið hreint fram

„Að mínu mati hefur borgin ekki komið hreint fram í þessu máli og hefur hún ekki staðið við þá samninga sem upphaflega voru gerðir um framtíð Reykjavíkruflugvallar og ef það hefði verið þá væri risin hér ný flugstöð í Vatnsmýrinni“, segir Ögmundur.

“Við þekkjum þennan ágreining sem er innan borgarinnar og innan Alþingis og ég tel að það sé eðlilegast að þjóðin segi sitt álit og með því væri hægt að höggva þannig á hnútinn þannig að borg og ríki gangi ekki gruflandi að því hver vilji þjóðarinnar er“.

Ögmundur bætir við: „Það er alveg vitað að vilji þjóðarinnar er afdráttarlaus, samkvæmt mörgum skoðanarkönnunum, sá að að halda vellinum í Vatnsmýrinni. Hinsvegar er eðiliegt að ef menn eru í vafa um það þá er bara að fá úr því skorið með formlegri atkvæðagreiðslu.

Reykjavíkurborg þyrfti sennilega þá að endurskoða sín áform

Ögmundur segir að þjóðaratkvæðagreiðsla um Reykjavíkruflugvöll sjálf sem slík muni ekki hafa bein áhrif á ákvörðun um framtíð neyðarbrautarinnar sem var lokað í sumar en tekur fram að ef eindreginn vilji kemur fram hjá þjóðinni um að halda vellinum í Vatnsmýrinni þá verði Reykjavíkurborg að endurskoða öll sín áform.

Ögmundur segir um mjög mikilvæg og jákvæð tíðindi að ræða fyrst almennur stuðningur sé við málið hjá Alþingi um að skjóta málinu til þjóðarinnar. Hann bendir á að ákvörðunin eigi heima hjá þjóðinni allri en ekki bara Reykvíkingum.

„Samkvæmt skoðunarkönnunum í seinni tíð þá er yfirgnæfandi meirihluti Reykvíkinga alfarið fylgjandi því að halda flugvellinum áfram í Vatnsmýrinni“, segir Ögmundur.