Yngsti kapteinn í heimi er aðeins 26 ára

- Flýgur fyrir easyJet og hefur m.a. flogið til Íslands

26. september 2016

|

Frétt skrifuð kl. 07:38

Kate McWilliams er 26 ára og var nýlega gerð að flugstjóra hjá easyJet

Bresk stúlka, sem er 26 ára og flýgur fyrir easyJet, var á dögunum gerð að flugstjóra hjá félaginu en talið er að hún sé bæði yngsti kvenmaður í heimi sem hefur orðið „pilot in command“ og yngsti flugmaðurinn sem gerður hefur verið að kapteini.

Kate McWilliams segir að hún sé spurð um aldur nánast á hverjum degi, bæði af farþegum og áhafnarmeðlimum og vekur það aðdáun hjá flestum yfir því hversu ung hún sé m.a.v. að vera flugmaður.

Kate hóf flugferil sinn aðeins 13 ára gömul árið 2003 og fór í sitt fyrsta sólóflug 16 ára en hún hóf atvinnuflugmannsferil sinn hjá CTC Aviation í Southampton er hún var 19 ára.

Í maí árið 2011 byrjaði hún að fljúga fyrir easyJet er hún var 21 árs sem aðstoðarflugmaður og flýgur hún bæði Airbus A319 og A320 þotum frá Gatwick-flugvelli til yfir 100 áfangastaða en hún hefur m.a. flogið til Íslands.

Kate flýgur til yfir 100 áfangastaða frá Gatwick-flugvelli

Kate segir að það komi varla fyrir að hún fljúga til sama áfangastaðarins tvisvar í mánuði þar sem easyJet flýgur til fjölmargra staða frá Gatwick-flugvelli en einn daginn flýgur hún til Tel Aviv, næsta til Marrakesh í Marrokó og til Keflavíkurflugvallar þess vegna því næst.

Kate segir að sem barn hafi hún ekki spáð mikið í flugið en þegar hún fór í fyrsta flugtímann var ekki aftur snúið. - „Ég elska að fljúga fyrir easyJet og ég er mjög stolt yfir því að vera núna orðin flugstjóri“, segir Kate.

Aðeins um 5% flugmanna hjá easyJet eru kvenmenn en lágfargjaldafélagið breska ætlar sér að auka hlutfall kvenna í stjórnklefanum upp í 12% á næstu tveimur árum.

Kate fór í fyrsta flugtímann sinn 16 ára árið 2006

Julie Westhorp, formaður félags breskra kvenflugmanna (BWPA) segir að árangur og frami Kate eigi eftir að hvetja fleiri konur til þess að fara í flugið.

Talsmaður easyJet segir að allt bendi til þess að Kate sé yngsta kona í heimi sem hafi verið gerð að flugstjóra en Kate hefur fært sig upp flugtímastigann hjá easyJet sl. fimm ár og stóðst á dögunum flugstjóraprófið og færðist þar af leiðandi yfir í vinstra sætið.

Í seinustu viku flaug Kate frá Gatwick til Möltu með Luke Elsworth sem fyrr á þessu ári varð yngsti atvinnuflugmaður Bretlands, aðeins 19 ára að aldri.

Kate Wiliams ásamt Luke Elsworth sem er yngsti atvinnuflugmaður Bretlands