BA sakað um að gera lítið úr heilsuspillandi eiturgufum í flugvélum

- 20 flugliðar, þrír flugmenn og tveir farþegar enduðu á sjúkrahúsi

5. nóvember 2016

|

Frétt skrifuð kl. 17:04

Starfsmannafélagið Unite segir British Airways gera lítið úr heilsuspillandi eiturgufum

Stéttarfélag yfir 20 þúsund flugliða sem starfa hjá British Airways sakar flugfélagið breska um að gera lítið úr þeim heilsuspillandi áhrifum sem eitraðar gufur geta haft á starfsumhverfi þeirra í kjölfar atviks er 25 manns um borð í Airbus A380 risaþotu voru fluttir á spítala í síðustu viku eftir að hafa veikst í háloftunum.

Risaþota British Airways var á leið sinni frá San Francisco til London Heathrow þann 24. október sl. en þegar vélin var í 37.000 fetum skammt austur af Vancouver þegar flugmenn vélarinnar lýstu yfir neyðarástandi um borð eftir að fjöldi farþega og flugliða veiktust skyndilega eftir að eitraðar gufur fóru að myndast um borð.

Vélin snéri við og lenti í Vancouver þar sem 25 manns voru fluttir á sjúkrahús vegna gruns um reykeitrun, 20 flugliðar, þrír flugmenn og tveir farþegar.

Stéttarfélagið Unite hefur farið fram á að rannsókn verði gerð á atvikinu auk þess sem rannsökuð verða þau áhrif sem loftgæði í flugvélum geta haft á heilsu áhafna en félagið gagnrýnir skoðun British Airways á málinu sem segir að einungis hafi um torkennilega lykt verið að ræða.

Airbus A380 risaþota British Airways á flugvellinum í Vancouver þann 25. október síðastliðinn

Annað sambærilegt atvik, en þó minna í umfangi, kom upp daginn eftir um borð í öðru flugi British Airways á leið frá London Heathrow til Los Angeles en það flug hélt þá för sinni áfram. Samkvæmt upplýsingum frá stéttarfélaginu þá þurfu flugmennirnir samt sem áður að setja á sig súrefnisgrímur eftir að þeir urðu varir við gufur af einhverju tagi.

Stéttarfélagið Unite segir að hvorki British Airways né bresk flugmálayfirvöld vilji viðurkenna málstað þeirra sem telja að eitraðar gufur um borð í flugvélum geti haft slæm áhrif á heilsufar áhafna.

„Það er alveg augljóst m.a.v. þær upplýsinga sem við höfum í höndunum, auk samtals milli flugmanna og flugumferðarstjóra varðandi atvikið þar sem risaþota British Airways þurfti að lenda í Vancouver, að þar var mun alvarlegra atvik á ferðum að aðeins „smávægileg lykt“, segir Howard Beckett, lögfræðingur hjá stéttarfélaginu.

„Að gera lítið úr hættulegum eiturefnagufum um borð í flugvélum með því að kalla það „atvik með lykt“ er aðeins útúrsnúningur og tilraun til að bæla niður alvarleika málsins og staðreynir“, segir Beckett sem tekur fram að slíkar gufur geti til lengri tíma haft mjög slæm áhrif á áhafnir.

Andrúmsloft í farþegarými getur orðið heilsuspillandi þegar efni á borð við olíu eða vökvakerfisolíu komast í snertingu við það loft sem loftflæðikerfið (bleed air) dælir inn í farþegarýmið frá hreyflunum í hringrás en loftið fer í gegnum loftræstisíur sem er ætlað að sía í burtu bakteríur og önnur óhreinindi.