Sex flugvélar lentu óvænt á Shannon milli jóla og nýárs

2. janúar 2017

|

Frétt skrifuð kl. 09:00

Farþegaþota United Airlines á flugvellinum á Shannon

Milli jóla og nýárs komu upp sex atvik þar sem flugvélar þurftu að lenda óvænt á Shannon-flugvellinum á Írlandi en í fimm tilvikum var um að ræða atvik þar sem veikindi komu upp meðal farþega um borð.

Á Nýársdag lenti farþegaþota á Shannon sem var á leiðinni frá Kuwait til JFK-flugvallarins í New York eftir að karlmaður á sjötugsaldri fékk verk fyrir brjóstið en sá farþegi lést skömmu síðar. Vélin hélt för sinni áfram til New York eftir tveggja tíma viðdvöl á Írlandi.

Á gamlársdag var Dreamliner-þota frá TUI komin hálftíma áleiðis til Barbados í Karíbahafi eftir flugtak frá London Gatwick þegar áhöfn um borð lýsti yfir neyðarástandi eftir að eldri kona missti meðvitund.

Vélin í um 250 kílómetra fjarlægð suðaustur af Cork og þurfi vélin að losa sig við eldsneyti fyrir lendingu á Shannon en konan var flutt á sjúkrahús í Limerick við komuna til Írlands.

Á Jóladag lést 10 ára gömul stúlka um borð í flugi Air Canada á leið frá Toronto til London Heathrow eftir að hún veiktist skyndilega en vélin lenti á Shannon-flugvelli skömmu síðar. Hjúkrunarkona var um borð í vélinni en tilraunir til endurlífgunar báru engann árangur.

Þá þurfti farþegaþota frá El Al Israel Airlines að lenda á Shannon-flugvelli á leið sinni frá Tel Aviv til Bandaríkjanna vegna gruns um fósturláts hjá ófrískri konu sem var farþegi um borð og daginn eftir á annan í jólum þurfti Boeing 767 þota frá Open Skies að lenda óvænt til að hleypa farþegum á klósettið vegna vandamáls með salernin um borð í vélinni.

Síðastliðinn föstudag (30. desember) þurfti flugvél frá British Airways að lenda á Shannon-flugvelli á leið sinni frá Miami til London vegna veikinda um borð og þá var farþegaþota frá Ethiopian Airlines sem þurfti að lenda á Shannon á aðfangadag til að taka eldsneyti þar sem flugvöllurinn í Dublin var búinn að loka starfsemi sinni yfir jólin.

Þar að auki þurftu sex flugvélar að lenda á Shannon á Þorkláksmessu þar sem veðuraðstæður voru of slæmar til að lenda á Cork og í Dublin.

Um 60 flugvélar þurftu að lenda á Shannon-flugvelli árið 2016 en helmingur þeirra tilfella voru vegna veikinda eða bráðatilvika en hinn helmingur atvikanna var vegna tæknilegra örðuleika, skyndilendingar tengdar veðri eða af öryggisástæðum.