Fyrstu prófanir Icelandair í Hvassahrauni fóru fram í gær

- Nýttu sér hvassviðrið og gerðu athuganir á ókyrrð yfir hrauninu

9. febrúar 2017

|

Frétt skrifuð kl. 11:34

Tölvugerð mynd af Boeing 757-200 yfir Hvassahrauni

Icelandair nýtti sér vetrarlægð sem gekk yfir suðvesturhluta landsins í gær og framkvæmdi fyrstu prófanirnar með aðflug í Hvassahrauni.

Umræða um flugvallarmálin á suðvesturhorni landsins, framtíð flugvallarins í Vatnsmýrinni og uppbygginguna á Keflavíkurflugvelli hefur verið mikið í brennidepli sl. misseri og hafa hugmyndir varðandi möguleika á flugvelli í Hvassahrauni einnig verið mikið til umræðu.

Icelandair tilkynnti sl. sumar að til stæði að framkvæma rannsóknir á veðurfarsskilyrðum í Hvassahrauni í þeim tilgangi að komast að því hvort að svæðið myndi henta fyrir nýjan alþjóðaflugvöll eða ekki.

Djúp lægð gekk yfir landið í gærmorgun með miklu hvassviðri víðast hvar og var því ákveðið að nýta þau skilyrði fyrir prófanir og voru fyrstu tilraunirnar framkvæmdar í gær..

Icelandair notaði Boeing 757-200 þotu í prófanirnar sem flaug nokkur flug í aðflugshæð yfir svæðið og gengu prófanirnar vel að sögn Hilmars B. Baldurssonar, flugrekstrarstjóra Icelandair.

Flugprófanirnar yfir Hvassahrauni í dag á Flightradar24.com

„Niðurstaðan er sú að við munum halda þessum athugunum áfram“, segir Hilmar í samtali við Alltumflug.is sem tekur fram að prófanirnar í dag hafi verið mjög jákvæðar og verður þeim haldið áfram.

Búið að teikna upp þrjú aðflug að brautum

Prófanirnar ganga fyrst og fremst út á að meta ókyrrðina á svæðinu þar sem Hvassahraun er nálægt fjalllendi á meðan Keflavíkurflugvöllur er úti á bersvæði.

Hilmar segir að búið sé að „teikna“ aðflug inn á stefnu á brautirnar eins og þær myndu mögulega koma til með að vera staðsettar á svæðinu sem flugvél Isavia hefur flugprófað en aðstæðurnar voru bæði prófaðar í flughermi og einnig af Isavia.

„Það er búið að teikna þrjár brautir á þessu svæði og við prófuðum aðflug inn á allar þessar þrjár brautir“, segir Hilmar sem tekur fram að eflaust muni á næstunni einnig fara fram prófanir með minni flugvélar heldur en Boeing 757.

„Við munum kanna þetta eins vel og við getum þannig að þegar kemur að því að taka ákvörðun þá verðum að vera sannfærðir um að þetta sé í lagi“.

Það var í júlí sl. sumar sem að Björgólfur Jóhannsson, forstjóri Icelandair Group, tilkynnti að til stæði að skoða möguleikann á því hvort að Hvassahraun myndi henta sem staðsetning fyrir nýjan flugvöll í ljósi afstöðu meirihluta borgarstjórnar Reykjavíkurborgar gagnvart framtíð flugvallarins í Vatnsmýrinni.