Icelandair kaupir Boeing 737 MAX flughermi

- Ný bygging mun rísa utan um herminn á Flugvöllum í Hafnarfirði

16. febrúar 2017

|

Frétt skrifuð kl. 12:24

Boeing 757 flughermirinn á Flugvöllum sem tekinn var í notkun fyrir 2 árum síðan

Icelandair hefur gert samning um kaup á nýjum flughermi sem mun bætast við þann hermi sem félagið er nú þegar með í notkun við þjálfun flugmanna á Flugvöllunum í Hafnarfirði.

Um er að ræða Boeing 737 MAX flughermi sem kemur frá TRU Simulation + Training í Kanada en Icelandair er fyrsta flugfélagið í heimi til að panta Boeing 737 MAX flughermi.

Boeing flugvélaframleiðandinn er um þessar mundir sjálfur að gangsetja fyrstu fjóra flughermana í heiminum fyrir Boeing 737MAX en Icelandair á von á því að hermirinn verði komin til lands næsta vor og verður hann tekinn í notkun sumarið 2018 en fyrstu Boeing 737 MAX vélarnar hjá Icelandair munu hefja áætlunarflug snemma á næsta ári.

Ný bygging mun rísa utan um nýja herminn

Ný bygging mun rísa utan um flugherminn sem verður áföst byggingunni á Flugvöllum þar sem Boeing 757-200 flughermirinn er núna til húsa sem var tekinn í notkun fyrir 2 árum síðan.

Rekstur hermisins hefur reynst mjög vel og á síðasta ári var nýting hans 18 klukkustundir að meðaltali á sólarhring. Icelandair er stærsti notandinn, en erlend flugfélög svo sem FedEx, kaupa einnig þjálfun fyrir sína flugmenn í herminum.

Stjórnklefinn um borð í Boeing 737 MAX þotunum

„Ákvörðunin um kaupin á 737MAX flughermi byggir einkum á hinum miklu vinsældum þessarar nýju flugvélagerðar en hún hefur selst hraðar en nokkur önnur vél í sögu Boeing“, segir Guðmundur Örn Gunnarsson, framkvæmdarstjóri TRU Flight Training Iceland.

„Um 3600 Boeing 737MAX hafa þegar verið seldar, til viðbótar við þær níu þúsund 737 vélar sem fyrir eru í heiminum, og ljóst að mikil spurn verður eftir flughermiþjálfun flugmanna þegar vélarnar koma á markað. Stefnt er að því að öll þjálfun flugmanna sem fljúga hinum sextán 737MAX vélum sem Icelandair hefur pantað verði hér á landi, og hefjist skömmu eftir að fyrstu vélarnar koma frá og með sumrinu 2018. Einnig mun hermirinn verða leigður út til þjálfunar flugmanna nokkurra þeirra fjölmörgu erlendu flugfélaga sem reka munu stóra flota MAX véla næstu áratugina,“ segir Guðmundur Örn.

TRU Flight Training Iceland er dótturfélag Icelandair sem sér um rekstur á flughermum og öðrum þjálfunarbúnaði. Flughermar eru nákvæmar eftirlíkingar af stjórnklefum viðkomandi flugvélagerðar, þeir líkja eftir flugeiginleikum og unnt er að kalla fram margháttaðar bilanir og óvæntar aðstæður sem og flug við breytileg veðurskilyrði til að reyna á þjálfun flugmanna.