Japanir vilja svarta kassa í litlar einkaflugvélar

8. mars 2017

|

Frétt skrifuð kl. 15:27

Að meðaltali verða 10 flugslys á ári í Japan og eru þau flest í einkafluginu

Samgönguörygginefnd Japans er að íhuga að fara fram á að einkaflugvélar verði líka útbúnar svörtum kössum líkt og stórar þotur í ljósi fjölda flugslysa í einkafluginu í Japan.

Algengt er að flugmenn láti lífið í flugslysum í einkaflugi og er því erfitt fyrir flugmálayfirvöld að komast að orsök slyssins í þeim tilvikum þar sem litlar flugvélar koma ekki með hljóðrita né flugrita.

Í júlí árið 2015 fórst lítil flugvél og brotlenti inn í húsi í japönsku borginni Chofu með þeim afleiðingum að átta létu lífið auk íbúa sem voru í húsinu.

Mánuði síðar, í ágúst 2015, létust tveir er fisflugvél fórst á golfvelli í Tsukuba og í mars árið 2016 áttu sér stað tvö flugslys þar sem lítil flugvél fórst í flugtaki og svifflugvél skall til jarðar í íbúðarhverfi í Japan.

Að meðaltali eru um 10 flugslys í Japan þar sem litlar einkaflugvélar eiga í hlut en verst var ástandið árið 2015 þegar 24 flugslys voru skráð í landinu sem hefur yfir 1.400 einkaflugvélar.

Af vettfangi flugslyss í Japan árið 2016

Í 96% tilvika þar sem flugslys eiga sér stað í Japan er um að ræða litlar vélar, fisflugvélar og svifflugur en algengasta orsökin slyssanna má rekja til mannlegra mistaka þar sem t.d. hefur gleymst að setja niður hjól fyrir lendingu, eldsneytisskortur eða þar sem vél er flogið í of lágri hæð.

Í nokkrum tilvikum hefur ekki verið hægt að komast að orsök slyssins þar sem flugmaðurinn, og þeir sem voru um borð í vélinni, lifðu slysið ekki af og er því ómögulegt að komast að því hvað í raun og veru gerðist sem olli slysinu.

Þar af leiðandi hefur samgönguöryggisstofnunin í Japan hrint í framkvæmt aðgerðaráætlun sem miðar af því að athuga hvort hentugur kostur sé að skylda litlar flugvélar til að vera útbúnar hljóðrita og flugrita til að auðvelda flugslysarannsókn.

Mögulega væri nóg að slíkur útbúnaður væri svipaður og finna má í bílum þar sem hægt er að fylgjast með ökuferðum bílstjóra.

Þá er einnig verið skoða möguleika á að koma fyrir loftpúðum í flugvélum líkt og er að finna í bílum til að draga úr högginu sem flugmenn og farþegar verða fyrir.

„Öryggisatriði í einkafluginu eru ábótavant. Upptökutæki ætti að vera staðalbúnaður í litlum vélum þar sem það getur verið erfiðara að stjórna lítilli flugvél samanborið við stóru farþegaþoturnar þar sem þær eru næmari fyrir vindi og öðrum aðstæðum“, segir Hajime Tozaki, prófessor við Otsuma-háskólann í Japan.