Nokkur flugfélög fella niður reglu um tvo í stjórnklefanum

- Reglugerðin ekki talin auka flugöryggi á neinn hátt

29. apríl 2017

|

Frétt skrifuð kl. 13:03

Í stjórnklefa á Boeing 737 þotu

Nokkur flugfélög í Evrópu, sem öll eru dótturfélög Lufthansa, ætla að afnema og fella úr gildi regluna um að ávalt skuli tveir í áhöfn vera í stjórnklefanum á öllum tímum á meðan á flugi stendur.

Flest flugfélög tóku upp þessa reglu í kjölfar þess er aðstoðarflugmaður hjá Germanwings grandaði Airbus A320 þotu félagsins vísvitandi í mars árið 2015 eftir að hann læsti sig inni í stjórnklefanum á meðan flugstjórinn brá sér á salernið.

Vélin fórst í frönsku Ölpunum og létust allir þeir 150 sem voru um borð í vélinni en atvikið varpaði einnig ljósi á þörf fyrir aukið eftirlit með almennri geðheilsu flugmanna þar sem í ljós kom að aðstoðarflugmaðurinn þýski hafði glímt við alvarlegt þunglyndi.

Lufthansa, SWISS International Air Lines og Austrian Airlines munu öll fella niður reglugerðina um tvo í stjórnklefanum frá og með 1. maí sem þýðir að ekki verður lengur þörf á að kalla til flugfreyju eða flugþjón fram í stjórnklefann ef annar flugmannanna bregður sér frá.

Mörg flugfélög segja að reglan með tvo í stjórnklefanum skapi aðra hættu auk þess sem reglan orsakar röskun á starfi áhafnarinnar

Þá mun Germanwings, sem nú hefur sameinast rekstri Eurowings, einnig ákveðið að afnema regluna en það mun þó taka í gildi þann 1. júní.

Flugmálayfirvöld í Evrópu (EASA) endurskoðuðu reglugerðina í fyrra og var flugfélögum tjáð að þau mættu ráða hvort að þau myndi fara eftir reglunni en skoðanir hafa leitt í ljós að reglan með tvo í stjórnklefanum hefur ekki náð að auka flugöryggi.

Fram kemur að hættan á því að flugmaður grandi þeirri flugvél sem hann er að fljúga vísvitandi séu litlar sem engar á sama tíma og að hætta á hryðjuverkum eða flugráni er mun meiri.

SWISS International Air Lines segir að í raun og veru hafi reglan boðið annarri hættu heim en sum flugfélög hafa bent á að hættan felist meðal annars í því að dyr flugstjórnarklefans eru opnar mun lengur á meðan flugliði er að koma sér fyrir á sama tíma og flugmaðurinn er að fara úr klefanum.

Lufthansa, SWISS og Austrian Airlines segja að reglan með tvo í stjórnklefanum verði felld á grundvelli þess að flugfélögin hafi náð að uppfylla öll önnur skilyrði EASA með öðrum hætti á borð við stöðugri starfskjör fyrir flugmenn og auðveldara aðgengi fyrir flugmenn að viðtölum hjá sálfræðingum.