Er þetta síðasta júmbó-þotan sem Boeing afhendir?

- Hafa smíðað allar farþegaútgáfur sem pantaðar voru af gerðinni Boeing 747-8

12. júlí 2017

|

Frétt skrifuð kl. 16:17

HL7644 verður afhent til Korean Air þann 31. júlí næstkomandi

Engin farþegaþotuútgáfa af júmbó-þotunni er á færibandinu hjá Boeing í Everett en sl. föstudag (7. júlí) lenti seinasta Boeing 747-8 þotan í Everett sem verið er að undirbúa fyrir afhendingu til Korean Air.

Vélin var máluð í Portland í litum flugfélagsins kóreska en engar fleiri pantanir af Boeing 747-8 þotunni bíða þess að vera smíðaðar en Boeing á enn eftir að smíða fleiri fraktútgáfur af júmbó-þotunni sem nefnist Boeing 747-8F.

Enn ríkir óvissa með nokkrar Boeing 747-8 júmbó-þotur sem hafa verið færðar til geymslu sem til stóð að afhenda til rússneska flugfélagsins Transaero sem varð gjaldþrota árið 2015.

Mögulegt er að framleiðsla á farþegaþotuútgáfu júmbó-þotunnar heyri sögunni eftir hálfrar alda framleiðslu en fyrsta Boeing 747 þotan leit dagsins ljós árið 1969.

Ólíklegt er að Boeing fái fleiri pantanir í Boeing 747 sem farþegaþotu þar sem flugfélög hafa sl. ár eingöngu pantað sparneytnari tveggja hreyfla breiðþotur á borð við Boeing 777X og Airbus A350.

Síðasta farþega-júmbóþotan hefur sig á loft frá flugvellinum í Portland þar sem hún var máluð í litum Korean Air

Boeing kynnti arftaka júmbó-þotunnar árið 2004 sem Boeing 747 Advanced en árið 2005 fékk hún heitið Boeing 747-8 og hafa aðeins þrjú flugfélög í heiminum pantað þá vél fyrir farþegaflug sem eru Lufthansa, Korean Air og Air China.

Aðeins þrjú flugfélög pöntuðu Boeing 747-8 fyrir farþegaflug

39 Boeing 747-8 hafa verið pantaðar og hafa 19 verið afhentar til Lufthansa, níu hafa verið afhentar til Korean Air og sjö þotur til Air China.

Þá hafa átta VIP-útgáfur af vélinni verið afhentar en 86 fraktútgáfur voru pantaðar (Boeing 747-8F) af félögum á borð við Cargolux, Silk West Airlines, Nippon Cargo Airlines, Volga-Dnepr Airlines, Korean Air Cargo, Cathay Pacific Cargo og tveimur fraktflugfélögum til viðbótar.

Síðasta farþegajúmbóþotan í bili ber skráninguna HL7644 og verður hún tíunda og jafnframt sú síðasta sem afhent verður til Korean Air þann 31. júlí næstkomandi.

Boeing 747-8 og risaþotan Airbus A380 eru einu fjögurra hreyfla farþegaþoturnar sem framleiddar eru í dag en risaþota Airbus hefur einnig átt erfitt uppdráttar að undanförnu.

Hæpið er að fleiri flugfélög eigi eftir að panta Boeing 747-8