Herferð Icelandair tilnefnd til fjögurra Euro Effie verðlauna

14. júlí 2017

|

Frétt skrifuð kl. 13:38

Skjáskot úr Stopover Buddy herferð Icelandair

Herferð Icelandair, Stopver Buddy, hlaut nýverið fjórar tilnefningar til Euro Effie auglýsingaverðlaunanna þar sem herferðin etur kappi við m.a. sænska ferðamálaráðið, Sodastream og Booking.com en það voru Íslenska auglýsingastofan og The Brooklyn Brothers í London sem unnu að herferðinni með Icelandair.

Icelandair Stopover Buddy herferðin tengdi farþega Icelandair við áhugavert og gestrisið starfsfólk fyrirtækisins, sem sýndu gestunum land og þjóð.

Flugfarþegar gátu skráð sig og óskað eftir ferðafélaga frá Icelandair eftir áhugasviði, tungumálakunnáttu og dagsetningum. Markaðssetning þjónustunnar fór aðallega fram á netinu og í gegnum almannatengsl en herferðin er ein farsælasta vefmarkaðsherferð Icelandair frá upphafi.

  Hugmyndin bakvið herferðina spratt upp úr niðurstöðum könnunar sem sýndi að 80% bandarískra ferðamanna hafa áhyggjur af því að líta út eins og túristar og að Bretar eyði 17 milljörðum punda meira en nauðsynlegt er í frí þar sem þekking þeirra á áfangastöðunum er takmörkuð.

Stopover Buddy var því kjörin lausn fyrir ferðamenn til þess að fræða þá betur um hvað Ísland sem áfangastaður hefur uppá að bjóða. Stopover-bókunum fjölgaði um 42% í kjölfar herferðarinnar og verðmæti fjölmiðlaumfjallana um Buddy-ferðir, herferðina og Icelandair var metið á yfir 250 milljón pund.  

Icelandair hlaut tilnefningar í alls fjórum flokkum:

Brand Experience, sem verðlaunar óhefðbundna markaðsetningu og heildarupplifun sem vörumerki búa til fyrir viðskiptavini sína

David vs Goliath, sem er flokkur fyrir smærri fyrirtæki í stórum geirum

Leisure & Entertainment, þar sem ferðaþjónustu- og afþreyingarfyrirtæki etja kappi

Small Budget, þar sem sýnt er fram á árangur og kostnað undir ákveðnu hámarki  

Buddy-herferðin hefur þegar hlotið alþjóðleg verðlaun, m.a. verðlaun þýsku ferðaþjónustunnar, Gullpálmann, árið 2016.  

Sérstaða Effie-verðlaunanna felst ekki síst í því að þau verðlauna árangur herferða og eru dómnefndir jafnan skipaðar fagfólki með umfagnsmikla markaðs- og auglýsingareynslu. Þau eru með þeim virtustu í auglýsingaheiminum og skipa sér á stall með Cannes Lions verðlaununum.