Hækka uppsagnarfrestinn úr sex mánuðum upp í 1 ár

- Reiðir flugstjórar fara í mál við indversk flugmálayfirvöld

6. september 2017

|

Frétt skrifuð kl. 14:10

Flugmenn segja að það sé ekki í verkahring flugmálayfirvalda að breyta uppsagnarfresti þeirra

Flugstjórar á Indlandi hafa ákveðið að fara í mál við indversk flugmálayfirvöld sem hafa ákveðið að hækka uppsagnarfrest þeirra úr sex mánuðum upp í tólf mánuði.

Þetta þýðir að ef flugstjóri ætlar sér að skipta um starf og byrja að fljúga hjá öðru flugfélagi þarf hann að vinna upp eins árs uppsagnarfrest en uppsagnarfrestur hjá flugmönnum helst óbreyttur.

Lögfræðingur félags indverskra atvinnuflugmanna segir að flugmálayfirvöld á Indlandi hefi ekki rétt á að breyta uppsagnarfresti þar sem það er ekki í þeirra verkahring og munu réttarhöld fara fram í málinu þann 16. október.

„Flugmenn eru mjög reiðir. Flugfélögin þeirra hafa ekki bætt þessari reglugerð við í ráðningarsamninga sína og hvers vegna eru flugmálayfirvöld að skipta sér að þessu“, segir flugstjóri einn á Indlandi.

Flugmálayfirvöld á Indlandi segja að ákveðið hafi verið að hækka uppsagnarfrestinn upp í 12 mánuði til að koma í veg fyrir að flugmenn myndu yfirgefa flugfélögin með skömmum fyrirvara þar sem slíkt hefur alvarlegar afleiðingar á reksturinn þar sem nauðsynlegt er þá að þjálfa nýja flugmenn sem bitnar á farþegum.

Þjálfun á Airbus A320 hjá Air India

Spáð er töluverðum sviptingum í ráðningum flugmanna á Indlandi á næstu árum þar sem mörg flugfélög þar í landi hafa pantað gríðarlegan fjölda nýrra þotna.

Amit Jain, formaður félags indverskra atvinnuflugmanna, segir það ekki þjóna neinum tilgangi að bregðast við þessu og hækka uppsagnarfrestinn af ótta við þess taps sem verður ef flugfélag þarf að þjálfa nýja flugmenn.

„Segjum sem svo að ég sé að fljúga Airbus A320 og gengst til liðs við annað flugfélag með sömu flugvélartegund þá er það eina sem breytist er reglugerð flugfélagsins um starfrækslu flugvélarinnar“, segir Jain.

„Ef ég er látinn breyta um flugvél og fara af Airbus A320 yfir á Boeing 737 hjá sama flugfélagi þá tekur það tvo mánuði að þjálfa mig á aðra flugvélategund. Hvernig á þetta að hafa áhrif á farþega?“, bætir Jain við.

Fyrrverandi yfirmaður hjá flugmálayfirvöldum á Indlandi segir að sex mánaða uppsagnarfrestur hafi verið tekinn í gildi á tíunda áratugnum en síðan þá hafi rekstarumhverfið breyst mikið og þjóni það engum tilgangi að tvöfalda uppsagnarfrestinn þar sem flestir flugmenn séu nú þegar búnir að skrifa undir tryggingu sem þeir þurfi að greiða til baka ef þeir yfirgefa flugfélagið.