Húsfyllir á kynningu Icelandair á nýrri námsleið í flugnámi

- 800 áhugasamir einstaklingar skráðu sig á fundinn „Flugmenn til framtíðar“

27. september 2017

|

Frétt skrifuð kl. 18:40

Yfir 800 manns skráðu sig á kynningarfund Icelandair þar sem félagið kynnti nýja leið fyrir þá sem vilja verða atvinnuflugmenn

Húsfyllir var á kynningarfundi Icelandair nú síðdegis í dag þegar ný námsleið í flugþjálfun var kynnt fyrir áhugasömum umsækjendum sem skráðu sig á fundinn.

Icelandair auglýsti í upphafi vikunnar að til stæði að setja upp þjálfunarbúðir fyrir framtíðarflugmenn félagsins þar sem félagið mun aðstoða við fjármögnun flugnámsins allt frá grunni að þotuþjálfun.

Birkir Hólm, framkvæmdarstjóri Icelandair, tók fram að búist var við 50 til 100 einstaklingum á fundinn sem upphaflega átti að fara fram í þjálfunarsetri Icelandair á Flugvöllunum í Hafnarfirði.

Aðsóknin fór hinsvegar fram út björtustu vonum þar sem yfir 800 manns skráðu sig á fundinn og varð því nauðsynlegt að flytja kynninguna í yfir í stærri húsakynni og hófst fundurinn kl. 17:00 á Hilton Reykjavik Nordica við Suðurlandsbraut.

Eftir stutta kynningu á sögu Icelandair fór Hilmar B. Baldursson, flugrekstrarstjóri Icelandair, yfir verkefnið sem byggir á svokölluðu „Cadet Program“ verkefni sem erlend flugfélög hafa notað til þess að velja hæfa umsækjendur sem eru þjálfaðir í flugnámi á kostnað viðkomandi flugfélags.

Með þessu er verið að ryðja úr vegi tveimur stórum ljónum sem vilja vera á vegi flugnema sem er annarsvegar atvinnuhorfur að flugnámi loknu og hinsvegar kostnaðurinn við flugnámið.

Hilmar B. Baldursson, flugrekstrarstjóri Icelandair, kynnti verkefnið á fundinum

Icelandair sér fram á áframhaldandi vöxt á næstu árum og til að tryggja að félagið hafi tiltæka flugmenn til að fljúga bæði núverandi flugflota, og nýjum Boeing 737 MAX þotum, sem félagið mun fá afhentar vorið 2018, hefur verið ákveðið að þjálfa hæfa umsækjendur sem munu gangast í gegnum svokallað samtvinnað atvinnuflugmannsnám.

Fyrstu flugmennirnir mögulega tilbúnir á þotu vorið 2019

Námið mun samanstanda af 6 mánaða bóklegu námi og verklegi hlutinn felur í sér 45 tíma sjónflug á einshreyfils flugvél, blindflug, næturáritun, flug á fjölhreyfla flugvél, áhafnarsamstarf og lýkur svo náminu með 48 klukkustunda tegundaráritun á þær þotur sem Icelandair hefur í flota sínum.

Námstíminn er í samræmi við þann tíma sem samtvinnað atvinnuflugmannsnám (IPPP) tekur hjá Flugakademíu Keilis en námsleiðin verður í samstarfi við Keilir, Flugskóla Íslands og Baltic Aviation Academy (BAA).

Til stendur að fyrstu flugnemarnir muni hefja þjálfun í nóvember

Umsækjendur munu næstkomandi föstudag geta skráð sig í sérstök inntökupróf þar sem viðtöl munu fara fram áður en valið verður úr þeim hópi sem mun hefja flugnám.

Stefnt er að því að fyrstu umsækjendurnir muni hefja flugnám í byrjun nóvember og verða þeir tilbúnir á þotu vorið 2019 áður en sumarvertíðin hefst það árið.

Aðsóknin á kynninguna þykir endurspegla mikinn áhuga ungs fólks á flugnámi og þeim tækifærum sem blasa við í fluginu enda hefur ekki verið boðið áður upp á þessa námsleið hér á landi áður.