Ferðakaupstefnan Icelandair Mid-Atlantic fer nú fram

26. janúar 2018

|

Frétt skrifuð kl. 16:41

Ferðakaupstefnan Icelandair Mid-Atlantic er sú stærsta sinnar tegundar sem haldin er á Íslandi

Ferðakaupstefnan Icelandair Mid-Atlantic, sem nú er haldin í 26. skipti, er stærsta ferðakaupstefna sem haldin er á Íslandi.

Kaupstefnan er haldin í Laugardalshöllinni á vegum Icelandair til þess að tengja saman kaupendur og seljendur ferðaþjónustu í þeim tilgangi að styrkja og auka ferðamannastraum til Íslands og er hún er árlegur lykilviðburður í ferðaþjónustunni.

Ferðamálaráðherra og forystumenn ferðamála á Íslandi hittu í dag fulltrúa á Icelandair Mid-Atlantic sem alls eru um 800 en af þeim koma um 450 frá 21 landi sem hafa mikil ferðaþjónustutengsl við Ísland í Evrópu og Norður-Ameríku og einnig frá fjarlægari mörkuðum.

Nýir þátttakendur koma m.a. nýjum áfangastöðum Icelandair á þessu ári, eins og t.d. frá borgunum Cleveland og Dublin. Vel á annað hundrað íslensk ferðaþjónustufyrirtæki víðs vegar að af landinu eru meðal þátttakenda og nýta þetta tækifæri til að kynna vöru sína og þjónustu. Alls eru rúmlega 240 sýningarbásar settir upp í Laugardalshöllinni og í þeim munu fara fram á sjötta þúsund bókaðir fundir milli viðskiptaaðila í dag.

Þátttakendur eru fulltrúar ferðaskrifstofa, hótela, bílaleiga, skemmtigarða og margvíslegra annarra ferðaþjónustufyrirtækja og að auki taka þátt opinber ferðamálaráð ýmissa þeirra svæða og borga sem Icelandair flýgur til í Norður-Ameríku og Evrópu.

“Þessi kaupstefna er einn helsti vettvangur ferðaþjónustunnar til að mynda tengsl við samstarfsaðila og kynna vöru sína beint fyrir kaupendum hennar. Mikill árangur og vöxtur ferðaþjónustunnar undanfarin ár er ekki tilviljun, heldur byggir á því að hafa frumkvæði að því að skapa ný viðskiptatækifæri. Kröftug þátttaka innlendra og erlendra aðila á Icelandair Mid-Atlantic er þess vegna mjög ánægjuleg”, segir Guðmundur Óskarsson, framkvæmdastjóri sölu- og markaðssviðs Icelandair.

Á meðfylgjandi myndum eru (1) Björgólfur Jóhannsson forstjóri Icelandair, Þórdís Kolbrún Reykfjörð Gylfadóttir, ferðamálaráðherra, Jón Ásbergsson framkvæmdastjóri Íslandsstofu, Skarphéðinn Berg Steinarsson, ferðamálastjóri og Guðmundur Óskarsson, framkvæmdastjóri sölu- og markaðssviðs Icelandair, Björgólfur Jóhannsson, forstjóri Icelandair og Þórdís Kolbrún Reykfjörð Gylfadóttir, ferðamálaráðherra að ganga um sýninguna.