23 Afríkulönd gera sáttmála um frjálsar flugsamgöngur

- Gæti stuðlað að 30% lægri flugfargjöldum í álfunni

30. janúar 2018

|

Frétt skrifuð kl. 13:35

Flugvélar South African Airways og Kenya Airways

Tuttugu og þrjú Afríkulönd hafa gert sáttmála um að opna lofthelgina yfir Afríku og mynda frjálsar flugsamgöngur líkt og í Evrópu í þeim tilgangi að efla flugiðnaðinn í álfunni.

Meðal aðildarlanda eru meðal annars Suður-Afríka, Nígería og Kenýa og er vonast til að með þessu verði hægt að lækka flugfargjöld og gera flugumhverfið í Afríku hagkvæmara en í dag er talið að Afríka sé eitt óhagkvæmasta og dýrasta svæði heims til að fljúga um fyrir flugfélög vegna þeirra sáttmála sem ríkja um flug milli landanna.

Framkvæmdarstjórar helstu flugfélaga í Afríku fagna niðurstöðunni en segja að enn sé langt í land áður en búið verður að koma á frjálsum flugsamgöngum og sé töluverð vinna framundan í samstarfinu.

Íbúar Afríku telja um 15% af mannkyninu en flugiðnaðurinn í álfunni telur hinsvegar aðeins 3 prósent af allri þeirri flugumferð sem á sér stað í heiminum samkvæmt upplýsingum frá Alþjóðaflugmálastofnuninni (ICAO).

Flugsamgöngur milli tveggja landa í Afríku eru oft erfiðar og oftast er hagkvæmasti kosturinn að fljúga frá einu Afríkulandi til annars með því að fljúga í gegnum Evrópu eða Miðausturlönd.

Flugsamgöngur í Afríku er lúxus en sjálfsagður hlutur í Evrópu

„Flugið er lúxusþjónusta í Afríku en í Bandaríkjunum og í Evrópu geta allir stokkið hvert sem er yfir eina helgi. Það er það sem við viljum líka“, segir David Kajange, yfirmaður ferðamálaráðs Afríku.

Samkvæmt skýrslu, sem Afríkudeild innan ICAO lét gera árið 2015, þá kom í ljós að ef Afríka væri undir sameiginlegum loftferðasamningum þá væri hægt að lækka flugfargjöld í álfunni um 35% og með því væri einnig hægt að laða að fjárfesta til að gera reksturinn enn betri fyrir mörg flugfélög.

Umræðan um frjálsar flugsamgöngur í Afríku er ekki ný af nálinni en samþykkt varðandi þessi mál var gerð árið 1988 er 44 lönd í Afríku gerðu með sér Yamoussoukro-samkomulagið sem kveður á um frelsi í flugsamgöngum en samþykktin hefur ekki verið innleidd fyrr en núna fyrst, 30 árum síðar.

„Til að koma á einum markaði fyrir öll löndin er kemur að lofthelgi þá verða hin löndin í Afríku að vera með ef þetta á að takast. Þá þarf að gera miklar endurbætur á flugvöllum, bæta flugöryggi og eftirlit með öllu í fluginu þarf að efla“, segir Nico Bezuidenhout, framkvæmdarstjóri flugfélagsins Fastjet.

Afríkusambandið vonast til þess að flugfarþegar fari að sjá sjáanlegar breytingar á næstu sex mánuðum með samkomulaginu.