Aukin gæði í flugkennslu með nýjum flughermi hjá Keili

- Hægt að þjálfa viðbrögð við krefjandi aðstæðum í sama stjórnklefaumhverfi

31. janúar 2018

|

Frétt skrifuð kl. 16:52

Byrjað verður að nota flugherminn við kennslu um mánaðarmótin

Flugakademía Keilis mun í byrjun febrúar taka í notkun nýjan og fullkomin flughermi sem líkir eftir hinni tveggja hreyfla Diamond DA42 kennsluflugvél.

Flughermirinn er sá fullkomnasti á landinu sem notaður er við kennslu í atvinnuflugmannsnámi og sá næstfullkomnasti á eftir þjálfunarhermi Icelandair sem er að finna á Flugvöllunum í Hafnarfirði.

Hermirinn mun gefa flugnemum hjá Flugakademíunni kost á að fá enn ítarlegri þjálfun þar sem hægt verður að æfa aðstæður og viðbrögð sem almennt er ekki hægt að æfa í kennsluflugi og mun það skila sér í betri þjálfun meðal nemenda.

Stjórnklefinn í flugherminum er nákvæmlega eins og klefinn í DA42 kennsluvélinni og finnur nemandi því nánast engan mun á umhverfinu sem gerir þjálfunina raunverulegri.

Með nýja flugherminum má æfa í ítarleg atriði við ýmsar aðstæður sem koma upp og þjálfa ákvörðunartöku flugmannsins við þeim.

Snorri P. Snorrason, skólastjóri Flugakademíunnar hjá Keili, segir að ekki var beinlínis þörf fyrir annan flughermi en skólinn tók hinsvegar ákvörðun um að fá hermi sem skilar nemendum meiri árangri og sé því um að ræða mikla breytingu er kemur að gæðum á flugkennslunni.

Hægt að æfa viðbrögð við aðstæðum sem ekki er hægt að æfa á flugi

„Við erum komin með „cadet-prógrammið“ hjá Icelandair og svo erum við í viðræðum við fleiri flugfélög varðandi samstarf og til þess þá þurfum við að fara alla leið svo við getum boðið flugfélögum upp á það sem þau eru að leita eftir“, segir Snorri.

Hægt er að kalla fram hvaða flugvöll sem er í heiminum og velja hvaða veður sem er

Snorri bendir einnig á að í flugkennslu er yfirleitt eingöngu verið að æfa viðbrögð við mótormissi sem hluta af neyðarviðbrögðum en með nýja herminum má fara í ítarleg atriði og líkja eftir ýmsum aðstæðum sem geta komið upp og þjálfa ákvörðunartöku flugmannsins við þeim.

Í flugherminum, sem kemur nýr frá Diamond-framleiðandanum, þá má kalla fram allar tegundir af veðri og vindum, velja alla helstu flugvelli heims og kalla fram margvíslegar bilanir.

Redbird-hermirinn, sem Keilir tók í notkun árið 2015, hefur reynst skólanum mjög vel og hefur hann boðið upp á góða möguleika í grunnþjálfun, þjálfun á stjórntækjum og sem þjálfunartæki í blindflugi.

Hermirinn var komin upp um miðjan janúar og fékk vottun frá Samgöngustofu þremur dögum síðar

Sá hermir verður notaður áfram en með nýja Diamond DA42 herminum verður hægt að þjálfa nemendur á tveggja hreyfla vél í sama umhverfi og þeir venjast er þeir sitja í kennsluvélinni í verklega hlutanum þar sem hægt verður að líkja eftir aðstæðum með mun raunverulegri hætti.

Nýi flughermirinn verður bæði notaður í atvinnuflugmannsnámi og samtvinnuðu atvinnuflugmannsnámi (Intergrated Pilot Program) innan skólans.

Ljósmyndir: Marie-Laure Parsy