Flugstjóri vill aukin lög um dróna og harðari refsingar

- Tvö atvik í mars þar sem drónum var flogið í veg fyrir þotur í Auckland

3. apríl 2018

|

Frétt skrifuð kl. 08:20

David Morgan, yfirflugstjóri hjá Air New Zealand, vill herða lög og reglugerðir varðandi dróna

Air New Zealand fer fram á að reglugerðir um dróna verði hertar eftir að litlu munaði að farþegaþota frá flugfélaginu nýsjálenska hefði lent í árekstri við dróna á dögunum.

Þota félagsins, sem er af gerðinni Boeing 777-200, var að koma inn til lendingar á flugvellinum í Auckland á Nýja-Sjálandi þann 25. mars sl. þegar atvikið gerðist.

Dróninn fór það nálægt flugvélinni að flugmennirnir höfðu mestar áhyggjur yfir því að hann myndi fara inn í hreyflana.

Flugmennirnir komu auga á drónann á þeim tímapunkti að ekki var hægt að bregðast við með neinum ráðum þar sem vélin var á lokastefnu að brautinni.

David Morgan, yfirflugstjóri hjá Air New Zealand og flugrekstarstjóri félagsins, segir að það sé augljóst að það verði að setja stólinn fyrir dyrnar fyrir alvöru til að koma í veg fyrir háskalega notkun á drónum í návígi flugvalla.

Boeing 777-200 þotan var að koma inn til lendingar í Auckland þegar
dróna var flogið í veg fyrir hana

Morgan segir að drónatilvikum fari fjölgandi á Nýja-Sjálandi og verði yfirvöld að tryggja öryggi almennings með enn strangari lögum um notkun þeirra, aukinni fræðslu og harðari refsingum.

„Það er komið að því að við verðum að taka hart á þessu og uppræta glæfralega notkun á drónum í kringum flugvelli“, segir Mogran sem leggur til að fangelsisdómur verði tekin upp gagnvart athæfum af þessum toga.

Í dag eru viðurlög við notkun á drónum í návígi nýsjálenskra flugvalla sekt upp á 350.000 krónur en reglugerð fer fram á að drónum sé ekki flogið nær flugvöllum en sem nemur 4 kílómetrum.

Margir drónar koma í dag með hugbúnaði sem læsir notkun þeirra ef verið er að fljúga þeim nálægt flugvöllum og yfir bannsvæði en vitað er að mjög auðvelt er að gera þann búnnað óvirkan.

Þetta er í annað skiptið sem dróna er flogið í veg fyrir farþegaþotu á flugvellinum í Auckland á Nýja-Sjálandi í marsmánuði en þann 6. mars stöðvaðist flugumferð í um hálftíma á sama flugvelli eftir að flugmaður kom auga á dróna í lofthelginni við flugvöllinn í aðflugi.

Air New Zealand hefur birt á vefsíðu sinni stuðningsyfirlýsingu gegn hertari lögum gegn drónanotkun þar sem skorað er á að yfirvöld grípu í taumana.