Flugstjórinn í andlegu ójafnvægi og reykti í stjórnklefanum

- Tók vantraustsyfirlýsingu frá starfsmanni inn á sig og brast í grát

27. ágúst 2018

|

Frétt skrifuð kl. 12:14

Flak vélarinnar á fótboltavellinum nálægt flugvellinum í Kathmandu

Talið er að flugstjóri Bombardier Q400 flugvélar, sem brotlenti í aðflugi að flugvellinum í Kathmandu í Nepal í vor, hafi verið á barmi taugaáfalls og í miklu andlegu ójafnvægi sem rekja má til ásakanna frá samstarfskonu hans sem hafði efast um hæfni hans sem flugmanns.

Flugslysið átti sér stað þann 12. mars er flugvél frá flugfélaginu US-Bangla Airlines var í aðflugi að Kathmandu en flugvélin brotlenti á fótboltavelli nálægt flugbrautinni með þeim afleiðingum að 51 af þeim 71 sem voru um borð létu lífið.

Drög að bráðabirgðarskýrslu slyssins var lekið í fjölmiðla um helgina og kemur þar fram að flugstjórinn, sem hét Abid Sultan, hafi verið í mjög annarlegu ástandi í stjórnklefanum skömmu yfir slysið og keðjureykti í stjórnklefanum til þess að róa sig.

Þá kemur fram að hann hafi nokkrum sinnum brostið í grát og talað stanslaust við aðstoðarflugmann sinn um samstarfskonu sína hjá flugfélaginu sem hafði ítrekað efast um hæfni hans sem flugmann og þjálfunarflugstjóra.

Flugstjórinn Abid Sultan og aðstoðarflugmaðurinn Prithula Rashid létust bæði í slysinu

Í skýrslunni kemur fram að ítrekaðar vantraustsyfirlýsingar hafi komið honum úr jafnvægi sem varð til þess að Abid fór að reykja í stjórnklefanum og var hann við það að fá taugaáfall skömmu fyrir lendingu.

Þá kemur fram í skýrslunni að andlegt ástand flugstjórans hafi truflað einbeitingu aðstoðarflugmannsins Prithula Rashid sem átti í erfiðleikum með að átta sig á stöðu vélarinnar í aðfluginu að flugbrautinni í Kathmandu.

Prithula Rashid var ráðin til US-Bangla Airlines árið 2016 en hún hafði aldrei áður lent á flugvellinum í Kathmandu í Nepal. Rashid lifði slysið af og var flutt á sjúkrahús en lést þremur vikum síðar af sárum sínum.

Flugvélin var af gerðinni Bombardier Dash 8 Q400

Í bráðabirgðarskýrslunni kemur fram að ekki var farið yfir tékklistann fyrir aðflugið og þá var hraðinn of mikill miðað við þá flughæð sem vélin var komin í og þá var gerð breyting á stefnu vélarinnar á stuttri lokastefnu.

Abid Sultan, sem var með yfir 15.000 flugtíma að baki, var eitt sinn herflugmaður í flughernum í Bangladesh áður en hann gekk til liðs við US-Bangla Airlines en þá var hann einnig flugkennari og þjálfunarflugstjóri hjá félaginu.

Flugslysið er talið eitt það mannskæðast í Nepal í 26 ár eða frá því að þota frá PIA (Pakistan International Airlines) fórst í landinu árið 1992.