Flugmaðurinn hans Sala lauk ekki atvinnuflugmannsnámi

- „Ábyrgð skipuleggjenda að athuga hvaða réttindi flugmaður hefur“

4. mars 2019

|

Frétt skrifuð kl. 18:38

Flugmaðurinn, David Ibbotson, var 59 ára

Komið hefur í ljós að David Ibbotson, flugmaðurinn sem flaug Piper Malibu PA-46 flugvél með argentínska knattspyrnumanninum Emiliano Sala, sem fórst yfir Ermasundi á leið frá Nantes til Cardiff í lok janúar, var ekki handhafi atvinnuflugmannsskírteinis sem til þarf til að mega fljúga með farþega gegn greiðslu.

Fram kemur að David hafi stundað atvinnuflugmannsnám við flugskólann Cranfield Aviation Training School í Milton Keynes, skammt norður af London, en hætti í náminu þegar hann var búinn með þriðjunginn af bóklega náminu.

David hóf atvinnuflugmannsnámið í desember 2012 en hætti árið 2014 þar sem honum gekk ekki vel í bóklega hlutanum.

Stuart E. Smith, yfirmaður flugskólans, segir að David hafi haft samband við sig árið 2016 varðandi að klára atvinnuflugnámið en hafði samt aldrei gert neitt í því að snúa aftur á skólabekk.

„Það er algengt að miðaldra menn, sem hafa verið einkaflugmannsskírteni, fari í atvinnuflugnám til þess að öðlast CPL réttindi til þess að þiggja laun með því að fljúga með farþega eða gerast flugkennarar“, segir Smith en einnig eru einhverjir sem fara til flugfélaganna.

Martin Robinson, framkvæmdarstjóri félags einkaflugmanna í Bretlandi (AOPA), segir að sá sem skipulagði flugið fyrir Sala, hefði átt að ganga úr skugga um að viðkomandi flugmaður væri hæfur fyrir flugið, með reynslu á flugvélina og þekkingu til þess að meta veðrið á leiðinni.

Flugvélin sem fórst þann 21. janúar var af gerðinni Piper Malibu

Þetta varpar ljósi á þá spurningu hvort að David hafi verið löglegur að fljúga flugið með Sala en fram kemur að hann hafi verið með einkaflugmannsskírteini og ekki með blindflugsáritun en atvinnuflugsskírteinis er krafist til þess að fljúga með farþega og fá greitt fyrir samkvæmt reglugerðum EASA.

Lík fótboltakappans fannst í kjölfar leitar sem framkvæmd var af einkaaðilum að beiðni fjölskyldu Sala sem fór af stað með hópfjármögnun til þess að styrkja leitina en lík David, sem var 59 ára gamall, hefur ekki enn fundist og er hann talinn af.

Emiliano Sala, sem var 29 ára, hafði gert saming við fótboltaliðið í Cardiff skömmu fyrir slysið

Rannsóknarnefnd flugslysa í Bretlandi (AAIB) rannsakar nú hvort að David hafi flogið með Sala og þegið greiðslu fyrir en farþegar mega þó taka þátt í kostnaðinum með því að greiða helming af honum til flugmanns með einkaflugmannsskírteini.

David hafði sagt félaga sínum, skömmu fyrir flugferðina, að hann hafði ekki flogið í langan tíma og væri sennilega orðin smá „ryðgaður“ á Piper Malibu en umboðsmaður Sala hafði reynt að fá annan flugmann til þess að fljúga fótboltakappanum til Bretlands en sá hafði ekki tíma til þess.