Mun færri pantanir á fyrsta degi samanborið við síðustu ár

- Boeing fékk enga pöntun samanborið við pantanir í 240 þotur árið 2017

17. júní 2019

|

Frétt skrifuð kl. 20:58

Aðeins bárust þrjár pantanir í 153 nýjar farþegaþotur á fyrsta degi flugsýningarinnar Paris Air Show sem hófst í dag

Töluvert færri pantanir í nýjar farþegaþotur voru gerðar í dag á fyrsta degi flugsýningarinnar í París en þess má geta að engin pöntun barst til Boeing sem hefur ekki gerst í mörg ár.

Á sama tíma á síðustu flugsýningu í París, sem fram fór í júní árið 2017, stal Boeing 737 MAX senunni og fékk framleiðandinn þá pantanir í 240 nýjar þotur frá 10 viðskiptavinum samanborið við pantanir í 0 flugvélar í dag.

Þann dag fékk Airbus aðeins eina pöntun en þó risapöntun frá GECAS flugvélaleigunni sem pantaði 100 eintök af Airbus A320neo þotunni.

Þá fékk ATR flugvélaframleiðandinn tvær pantanir í 13 nýjar flugvélar á fyrsta degi árið 2017 en enga pöntun í ár og Bombardier fékk eina pöntun í sjö Bombardier Dash 8 Q400 flugvélar en enga pöntun í dag.

Kynntu Boeing 737 MAX 10 og A380plus árið 2017

Boeing kynnti á fyrsta degi sýningarinnar fyrir 2 árum síðan Boeing 737 MAX 10 til leiks sem er lengsta útgáfan sem til stendur að framleiða af Boeing 737 MAX og á fyrsta deginum fyrir 2 árum kynnti Airbus A380plus sem átti að vera uppfærsla af risaþotunni A380 sem framleiðandinn ákvað í fyrra að hætta að framleiða.

Airbus kynnti strax við upphaf sýningarinnar í dag Airbus A321XLR sem verður langdrægasta farþegaþota heims í flokki „mjóþotna“ sem koma með einum gangi og hefur flugvélaleigan Air Lease pantað 27 eintök af A321XLR og þá hefur Middle East Airlines pantað 4 slíkar þotur.

Á súluritunu má sjá þróunina í fjölda pantaðra flugvéla á sl. flugsýningum í París en toppnum var náð árið 2013

Þrátt fyrir að metföldi fyrirtækja séu á flugsýningunni í París í ár þá fer sýningin fjórum sinnum hægari af stað samanborið við 2017 ef litið er til fjölda pantanna á fyrsta degi.

Í dag komu inn pantanir í 153 nýjar flugvélar frá þremur viðskiptavinum sem Airbus og Embraer skipta á milli sín en árið 2017 voru gerðar pantanir í 413 flugvélar á fyrsta sýningardegi.

Er fjöldi pantanna í nýjar flugvélar í dag aðeins 37% af þeim pöntunum sem áttu sér stað á fyrsta sýningardegi árið 2017 og aðeins 26% af þeim fjölda flugvéla sem pantaðar voru árið 2013 á fyrstra degi.

Flestar pantanirnar á fyrsta degi á Paris Air Show áttu sér stað árið 2013 er flugfélögin pöntuðu 578 flugvélar en á fyrsta degi á sýningunni árið 2015 voru pantaðar 453 flugvélar.