Nýja vandamálið með Boeing 737 MAX varðar örgjörva

- Uppgötvuðu vandamál í örgjörva sem gæti hamlað snögg neyðarviðbrögð

27. júní 2019

|

Frétt skrifuð kl. 14:01

Það voru flugmenn hjá FAA sem uppgötvuðu nýja vandamálið þegar þeir voru að prófa uppfærslur Boeing á MCAS-kerfinu

Nýtt vandamál, sem uppgötvaðist varðandi Boeing 737 MAX þoturnar sem greint var frá í gær, virðist vera mögulegur galli eða vanvirkni í örgjörva sem einnig getur framkallað tilhneigingu í stjórnbúnaði þotunnar til að beina nefi hennar niður á við líkt og talið er að hafi gerst í tveimur flugslysum sem varð til þess að 737 MAX var kyrrsett í mars.

Fram kom í fjölmiðlum í gær að bandarísk flugmálayfirvöld (FAA) hefðu komið auga á nýtt vandamál við prófanir í Boeing 737 MAX flughermi en ekki var tilgreint hvers eðlis vandamálið væri.

Samkvæmt heimildarmanni, sem er kunnugur málinu, þá voru flugmenn á vegum hiðs opinbera, sem eru starfsmenn bandarískra flugmálayfirvalda, að framkvæma prófanir á nýju uppfærslunni á MCAS-kerfinu, sem Boeing hefur unnið að í kjölfar flugslysanna tveggja, þegar þeir uppgötvuðu bilun í virkni í örgjörva sem gæti orðið til þess að lágréttur stélflötur þotunnar fer að beina nefi þotunnar niður á við í átt að jörðu, á sama hátt og vandamálið hefur snúist um hingað til.

Boeing 737 MAX í samsetningu í Renton

Ekki er vitað hvort að örgjörvinn hafi spilað hlutverk í flugslysunum tveimur þar sem rannsókn á þeim slysum er í fullum gangi.

„Þegar verið var að prófa virkni örgjörvans í flughermi í síðustu viku þá reyndist erfitt fyrir flugmennina hjá FAA að bregðast fljótt við tilteknu neyðarviðbragði og ef ekki er hægt að bregðast við á örfáum sekúndum þá er það mjög varasamt“, segir einn aðili.

Boeing hefur varið um 8 mánuðum í að finna lausn á vandamáli í hugbúnaði á Boeing 737 MAX þotunum á kerfi sem kallast MCAS sem er ætlað að koma í veg fyrir ofris í viðkvæmum hluta flugsins sem er þá aðallega flugtakið.

Talið er að er kemur að flugslysunum tveimur hjá Lion Air og Ethiopian Airlines að þá hafi mögulegur galli í skynjurum sent fölsk boð um ofris og látið MCAS kerfið bregðast við með því að beina nefi vélarinnar niður á við þegar þess var ekki þörf. Ekki hefur komið enn í ljós hvort að flugmennirnir í þeim tveimur flugslysum hafi brugðist rétt við er kemur að því að aftengja MCAS-kerfið við slíkar aðstæður og er það meðal þess sem verið er að rannsaka.

Boeing 737 MAX þoturnar hafa verið kyrrsettar frá því um miðjan mars

Ekki er vitað hvort að örgjörvinn eigi hlut að máli í slysunum tveimur en aðilar, sem eru kunnugir málinu, segja að verkfræðingar hjá Boeing séu að reyna að átta sig á vandamálinu með örgjörvana og ætla að endurforrita þá en einnig gæti komið til þess að skipta þarf um örgjörvana á öllum Boeing 737 MAX þotunum.

Þá hefur ekki komið í ljós hvort að þessi nýju atriði sem flugmenn hjá FAA uppgötvuðu í seinustu viku eigi eftir að seinka því að kyrrsetningu Boeing 737 MAX verði aflétt en engin dagsetning er komin varðandi það hvenær vélarnar geta farið að fljúga á ný.