Herflugvél með 38 um borð hvarf af ratsjá yfir Suður-Íshafi

- Var á leið frá Chile til Suðurskautslandsins þegar samband rofnaði

chile

10. desember 2019

|

Frétt skrifuð kl. 07:11

38 manns voru um borð í flugvélinni sem hvarf tæpri einni og hálfri klukkustund eftir brottför

Herflutningaflugvélar af gerðinni Lockheed C-130H Hercules, frá flughernum í Chile með 38 manns um borð, er saknað eftir að hún hvarf af ratsjá í gærkvöldi yfir Suður-Íshafi, mitt á milli syðsta odda Suður-Ameríku og Suðurskautlandsins.

Herflugvélin fór í loftið frá Chabunco-herstöðinni í Punta Arenas klukkan 19:55 í gærkvöldi að íslenskum tíma og var förinni heitið til President Eduardo Feri Montalva herflugvallarins sem er bækistöð á King George eyju á þeim hluta Suðurskautslandsins sem tilheyrir Chile.

Samband við vélina rofnaði hinsvegar tæpri einni og hálfri klukkustund síðar, klukkan 21:13 UTC í gærkvöldi, og er talið að vélin hafi farist yfir hafinu. Eduardo Mosqueira, yfirmaður innan flughersins í Chile, segir að að áhöfnin hafi gert tilraun til þess að lenda „einhversstaðar“ en ekkert neyðarkall barst frá flugvélinni.

Flugvélin var hálfnuð yfir „Drake Passage“ er sambandið
rofnaði

Um borð í flugvélinni voru 17 áhafnarmeðlimir og 21 farþegi en tilgangur fararinnar var að sinna viðhaldsvinnu á fljótandi eldsneytisleiðslu sem hitar og kyndar upp starfsstöð fyrir þá sem þar dvelja hverju sinni á Presidente Eduardo Frei Montalva stöðinni.

Flugherinn í Chile hefur sent björgunar- og leitarflugvélar af stað til þess að finna flugvélina en talið er að hún hafi verið komin um 450 mílur áleiðis af flugleiðinni sem telur 770 mílur.

Því er talið að vélin hafi verið hálfnuð yfir Drake-sundið sem skilur að syðsta odda Chile og Antarktíku-skagann á Suðurskautslandinu en á þessu svæði geisa oft verstu óveður sem finna má á jörðinni sem tilheyrir „Furious Fifties“ svæðinu í kringum 50°S breiddargráðu á suðurhvelinu.

Herflutningaflugvél sömu gerðar og sú sem saknað er

Presidente Eduardo Frei Montalva stöðin hefur 1.300 metra langa flugbraut en stöðin er mjög mikilvæg fyrir flugsamgöngur milli Suður-Ameríku og Suðurskautsins og þá er King George eyjan einnig laus við allan ís, ólíkt meginlandi Suðurskautsins.

Dvalið er allan ársins hring á stöðinni og í þorpinu Villa Las Estrellas má meðal annars finna sjúkrahús, skóla, banka og lítla matvöruverslun. Um 80 manns dvelja í Villa Las Estrellas allan ársins en yfir sumartímann eru um 150 manns sem hafa þar viðdvöl og er stór hluti af þeim vísindamenn.