Svartsýnn á að Ryanair geti flogið 737 MAX næsta sumar

- „EASA virðist vera að draga lappirnar“

11. desember 2019

|

Frétt skrifuð kl. 11:26

Ryanair hefði átt að vera komið með yfir 30 Boeing 737 MAX þotur fyrir lok þessa árs

Sú staða gæti komið upp að Boeing 737 MAX þoturnar verði ekki farnar að fljúga á ný innan Evrópu fyrir sumarið 2020 þrátt fyrir að þær verði byrjaðar að fljúga aftur í áætlunarflugi vestanhafs.

Michael O´Leary, framkvæmdarstjóri Ryanair, segir að þar sem evrópsk flugmálayfirvöld (EASA) ætla að framkvæma sína eigin úttekt á þeim breytingum sem gerðar hafa verið á Boeing 737 MAX þotunum, óháð vottun bandarískra flugmálayfirvalda (FAA), þá muni það taka lengri tíma að koma vélunum í loftið í Evrópu.

O´Leary segir að vélarnar gætu verið kyrrsettar fram í apríl eða maí í Evrópu en að því loknu eiga evrópsk flugfélög eftir að koma vélunum í notkun sem tekur einhverjar vikur sem þýðir að háannatími sumarsins er hafinn.

„Við erum enn að bíða eftir því að hitta Boeing sem verður sennilega í janúar. Við teljum að MAX-vélarnar eigi eftir að fljúga á ný í Ameríku þessvegna í janúar. Við gerum ráð fyrir því að þetta verði eitthvað hægara ferli í Evrópu þar sem það lítur út fyrir að EASA er að draga lappirnar frekar mikið hvað þetta varðar“, segir O´Leary.

Ryanair átti að vera komið með yfir 30 eintök af Boeing 737 MAX 200 þotum núna fyrir lok ársins en lágfargjaldafélagið pantaði 200 slíkar þotur árið 2014. Til stóð að fyrsta eintækið yrði afhent í maí í vor en kyrrsetning vélanna í mars kom í veg fyrir það.

Ryanair pantaði 200 eintök af Boeing 737 MAX 200 árið 2014

„Kannski fáum við 10 þotur fyrir sumarið, kannski enga, kannski fimmtán. Það sem skipti mestu máli er að koma vélunum aftur í umferð“, segir O´Leary.

Talsmaður hjá EASA segir að stofnunin vilji sjá Boeing 737 MAX hefja sig til flugs á ný sem fyrst en það mun þó ekki gerast fyrr en búið er að ganga úr skugga um að flugvélarnar séu fullkomnlega öruggar og það verði ekki gert með þrýstingi frá rekstrarlegum eða pólitískum sjónarmiðum.

EASA hefur lýst yfir að stofnunin ætli sér að framkvæma sína eigin úttekt á Boeing 737 MAX og þá tók stofnunin það fram í haust að það vilji að prófanir verði gerðar bæði með MCAS-kerfið virkt og einnig án kerfsins. Hinsvegar hefur ekki verið ákveðin nein dagsetning hvenær þær prófanir munu fara fram.

Ryanair gerir ráð fyrir því að kostnaðurinn við kyrrsetningu vélanna fyrir flugfélagið miðað við eitt ár sé um 100 milljónir evra sem samsvarar 13.5 milljörðum króna.