Framleiðsla á Boeing 737 MAX stöðvast í byrjun janúar

- Mjög slæm áhrif fyrir Boeing ef stöðvunin dregst á langinn inn á nýja árið

17. desember 2019

|

Frétt skrifuð kl. 07:37

Framleiðsla á Boeing 737 MAX mun stöðvast strax um áramótin og er ekki vitað hvenær framleiðslan hefst á ný

Boeing hefur staðfest að framleiðsla á Boeing 737 MAX þotunum í verksmiðjunum í Renton verður stöðvuð tímabunduð en flugvélaframleiðandinn bandaríski tilkynnti um fyrirhugaða framleiðslustöðvun í gærkvöldi.

Hlé verður gert á samsetning á Boeing 737 MAX strax í janúar og er ekki vitað hvenær framleiðslan mun halda áfram að nýju en talið er að það fari eftir hversu langan tíma það mun taka að fá flughæfnisvottun útgefna að nýju sem mun þá aflétta kyrrsetningu vélanna.

„Við höfum lýst því yfir áður að við munu endurskoða framleiðsluáætlun okkar ef kyrrsetningin dregst á langinn. Niðurstaðan að þessu sinni er sú að við höfum ákveðið að setja í forgang að undirbúa afhendingar á þeim flugvélum sem eru í geymslu og hætta að framleiða fleiri þotur tímabundið strax í byrjun næsta mánaðar“, segir í yfirlýsingu sem Boeing sendi frá sér í gærkvöldi.

Þá kemur fram að ekki mun koma til uppsagna þótt að framleiðslan á Boeing 737 MAX muni stöðvast en mögulega verða starfsmenn færðir til og úthlutað starfi annarsstaðar á Seattle-svæðinu.

Frá samsetningarsalnum í Renton þar sem Boeing 737 MAX er framleidd

Flugsérfræðingurinn Michel Merluzeau hjá ráðgjafarfyrirtækinu AIR segir að Boeing gæti „jafnað sig“ á þessari stöðu ef MAX-þoturnar fá flughæfnisvottun og fara að fljúga fljótlega eftir áramót en ef það dregst lengra inn í árið 2020 gæti skaðinn versnað til muna fyrir Boeing.

Boeing segir að þessar aðgerðir koma til með að valda sem minnstri röskun á framleiðsluna og á aðra birgja til lengri tíma litið en ef framleiðslan fer ekki fljótlega aftur af stað mun það hafa slæm áhrif fyrir önnur fyrirtæki á borð við CFM International sem framleiðir hreyflana fyrir Boeing 737 MAX og Spirit AeroSystems sem framleiðir skrokkinn auk íhluta.

Yfir 400 eintök af Boeing 737 MAX þotum hafa safnast saman á nokkrum stöðum í Bandaríkjunum sem bíða þess að verða afhentar en bandarísk flugmálayfirvöld (FAA) hafa enn ekki séð ástæðu til þess að gefa út vottun fyrir þoturnar þar sem erfiðlega gengur að ganga úr skugga um að uppfærsla Boeing á svokölluðu MCAS-kerfi sé það örugg að hægt sé að útiloka að slysin tvö endurtaki sig aftur.