Fjórir flugmenn handteknir fyrir aðstoð við flótta

- Flugu með fyrrum forstjóra Nissan frá Japan til Tyrklands

6. janúar 2020

|

Frétt skrifuð kl. 08:03

Carlos Ghosn, fyrrverandi forstjóri Nissan, flúði stofufangelsi sitt milli jóla og nýárs og leigði sér einkaþotu til að yfirgefa Japan

Fjórir einkaþotuflugmenn hafa verið handteknir af tyrknesku lögreglunni, grunaðir um að hafa aðstoðað Carlos Ghosn, fyrrum framkvæmdarstjóra Nissan og Renault, við flótta frá Japan.

Ghosn hafði verið í stofufangelsi í Japan fyrir fjármálamisferli og hafði hann verið settur í farbann en honum tókst að flýja frá Japan skömmu fyrir áramót.

Í ljós kom að Ghosn hafði tekið á leigu einkaþotu sem flaug með hann frá Japan þann 29. desember til Istanbúl þar sem skipt var um einkaþotu og honum flogið þaðan til Beirút í Líbanon.

Ekki er staðfest hvaða einkaþota flaug Ghosn frá Japan en samkvæmt erlendum flugfréttamiðli kemur fram að eina einkaþotan sem flaug frá Japan til Tyrklands tveimur dögum fyrir gamlársdag var þota af gerðinni Bombardier Global Express með tyrknesku skráninguna TC-TSR en hún fór í loftið frá Kansai-flugvellinum í Osaka kl. 23.10 að staðartíma.

Einkaþotan sem talið er að hafi flogið með Carlos Ghosn frá Osaka þann 29. desember sl.

Sú þota lenti í Istanbúl kl. 17:26 að staðartíma og rúmri klukkustund síðar, kl. 18:30, fór einkaþota af gerðinni Bombardier Challenger 300, í loftið frá Istanbúl til Beirút. Báðar einkaþoturnar eru skráðar á fyrirtækið MNG Jet Aerospace

Innanríkisráðuneytið í Tyrklandi staðfesti að fjórir flugmenn hafi verið handteknir í tengslum við flótta Ghosn en talið er að þeir starfi allir fyrir leiguflugfélag sem hefur höfuðstöðvar í Istanbúl. Einnig voru þrír aðrir starfsmenn handteknir sem starfa fyrir flugþjónustufyrirtæki og fraktflugfélag.

Ghosn var látinn laus gegn tryggingu í apríl í fyrra en gert að halda sig á heimili sínu í Tókýó og voru öll vegbréf tekinn af honum en hann er með brasilískt, líbanonsk og franskt ríkisfang.

Einkaþotufyrirtækið hefur hafið rannsókn á leigunni á þotunum

MNG Jet Aerospace, sendi frá sér tilkynningu á nýársdag þar sem fram kemur að leigan á einkaþotunum hafi ekki verið „ólögleg“ og sé fyrirtækið að rannsaka með hvaða hætti þoturnar voru teknar á leigu.

Fram kemur að MNG Jet Aerospace hafi komist að tilgangi flugferðanna í gegnum fjölmiðla og segir fyrirtækið að ekki hafi verið skráð rétt nafn fyrir leigunni þar sem nafn Carlos Ghosn kom aldrei fram.

Við komuna til Istanbúl flaug Bombardier Challenger einkaþota með Carlos Ghosn til Beirút í Líbanon



„Flóttaflugið“ á Flightradar frá Osaka til Istanbúl