Fjórir grunnskólakennarar höfða mál gegn Delta Air Lines

- Kvarta undan ertingi eftir að hafa fengið þotueldsneyti yfir sig

20. janúar 2020

|

Frétt skrifuð kl. 15:41

Boeing 777 þotan frá Delta Air Lines þurfti að losa sig við þónokkuð magn af eldsneyti til að geta lent eftir á flugvellinum í Los Angeles

Fjórir grunnskólakennarar í Los Angeles hafa ákveðið að höfða mál gegn bandaríska flugfélaginu Delta Air Lines eftir atvik sem átti sér stað þar sem farþegaþota frá félaginu losaði sig við eldsneyti yfir nokkrum grunnskólum í borginni í kjölfar neyðartilfellis sem kom upp eftir flugtak.

Delta Air Lines hefur staðfest að flugvél á vegum félagsins hafi þurft að losa sig við eldsneyti en slíkt er gert í þeim tilgangi til að minnka þyngd vélarinnar svo hún geti lent aftur ef neyðaratvik kemur upp skömmu eftir brottför.

Lögfræðingur, sem fer með málið fyrir hönd fjögurra kvenna sem eru kennarar við grunnskólana, segir að skjólstæðingar sínir hafi fengið úða af eldsneyti upp í sig, í nefið, auk þess sem þeir fundu fyrir ertingi á húð og í augum. Þá segja kennararnir að þeir hafi þjást bæði af tilfinningalegum og líkamlegum óþægindum frá því að atvikið átti sér stað sl. miðvikudag.

Í málsókninni, sem var send til dómstóls í Los Angeles sl. föstudag, segir að þotueldsneyti sé hættulegt mönnum og sé vitnað í upplýsingar frá eiturefna- og sjúkdómavörnum Bandaríkjanna. Þá segir í málsókninni að þotueldsneyti geti valdið lifrarskemmdum, heyrnarskaða og geti skert ónæmiskerfi fólks.

Þá segja kennararnir að Delta Air Lines hefði í fyrsta lagi ekki átt að leyfa flugmönnunum að fara í loftið og að félagið hefði átt að stöðva brottförina og einnig saka þeir flugmennina um að hafa ekki fylgt reglugerðum.

Grunnskólakennararnir fjórir höfðuðu mál geng Delta Air Lines sl. föstudag

Samkvæmt lögum og reglugerðum í flugi er kemur að losun elsneytis, sem á flugmáli kallast á ensku „fuel jettisoning“ kemur fram að slíkt kerfi, sé það fyrir hendi, þurfi að geta losað flugvél við eldsneyti svo hægt sé að ná þyngd vélarinnar úr flugtaksþyngd (TOM - „Take-off Mass“) niður í lendingarþyngd (LM - „Landing Mass“) á 15 mínútum.

Farið er fram á að slíkt sé gert yfir svæði sem hentar til losunar og þá helst yfir sjó og það í yfir 10.000 feta hæð svo að eldsneytið nái að gufa upp í andrúmsloftinu áður en það nær að falla til jarðar.

Ef um alvarlegt neyðartilfelli er að ræða er flugmönnum heimilt að losa sig við eldsneyti tafarlaust og þá hvar sem er ef nauðsynlegt er að lenda sem fyrst.

Bandarísk flugmálayfirvöld (FAA) rannsaka nú atvikið sem átti sér stað yfir Los Angeles en stofnunin segir að flugmenn vélarinnar hafi losað sig við eldsneytið án þess að ráðfæra sig við flugumferðarstjóra en samkvæmt upptöku frá samskiptum milli flugturns og flugmanna þá sögðu flugmennirnir að það væri ekki nauðsynlegt að losa sig við eldsneyti þegar þeir voru spurðir að því.

Þotan, sem var af gerðinni Boeing 777, var á leið til Shanghai en skömmu eftir flugtak kom upp vandamál með hægri hreyfil vélarinnar.