Ferðabannið hefur áhrif á 17.000 flugferðir yfir Atlantshafið

- 40 flugfélög bjóða upp á 4.8 milljónir flugsæta á tímabilinu

12. mars 2020

|

Frétt skrifuð kl. 08:38

Yfir 40 flugfélög fljúga daglega á milli Evrópu og Bandaríkjanna

Ferðabann á milli Bandaríkjanna og Evrópu, sem mun taka í gildi á morgun, mun hafa áhrif á allt að 17.000 flugferðir sem fyrirhugaðar er fram og til baka yfir Atlantshafið næstu 30 daga.

Bandarísk stjórnvöld tilkynntu í gærkvöldi að ákveðið hefði verið að setja á bann við áætlunarflugi á milli Bandaríkjanna og Evrópu sem tekur í gildi á miðnætti.

Donald Trump, Bandaríkjaforseti, tilkynnti þetta seint í gærkvöld og nær bannið til allra aðildarlanda Evrópusambandsins og er tilgangur ferðabannsins að hefta úbreiðslu kórónaveirunnar í Bandaríkjunum en bannið nær þó ekki til Bretlands þrátt fyrir að þar hafa greinst yfir 456 tilfelli af COVID-19.

Alls eru um 40 flugfélög sem fljúga 560 flugferðir á dag yfir Atlantshafið á milli Bandaríkjanna og Evrópu með 160.000 farþega og mun bannið því koma til með að hafa áhrif á 17.000 flugferðir þar sem 4.8 milljónir flugsæta eru í boði á tímabilinu.

Þau Evrópulönd sem taka við flestum flugferðum frá Bandaríkjunum eru Þýskaland, Frakkland og Holland en önnur lönd þar sem flugumferð er mikil til og frá Bandaríkjunum eru meðal annars Tyrkaland, Spánn, Sviss og Portúgal.

Bannið mun bitna verst á American Airlines, Delta Air Lines og United Airlines en til samans fljúga þessi flugfélög yfir 200 flugferðir á dag yfir Atlantshafið.

Af evrópskum flugfélögum þá kemur bannið sér verst fyrir Lufthansa sem flýgur 60 flugferðir á dag á milli Þýskalands og Bandaríkjanna og Air France sem flýgur 37 ferðir á dag. Önnur flugfélög sem fljúga mörg flug á dag til Bandaríkjanna eru Aer Lingus, KLM og SWISS International Air Lines.

Bannið mun taka í gildi á miðnætti á morgun

Ekki er vitað enn hversu mikil áhrif þetta mun hafa á rekstur flugfélaga sem bætist ofan á þá erfiðleika sem þau standa frammi fyrir vegna útbreiðslu veirunnar en þau flugfélög sem hafa leiðarkerfi, sem að stórum hluta samanstendur af flugi til Bandaríkjanna, munu koma verst undan ferðabanninu.

Flugfélög sem fljúga til og frá Bandaríkjunum vinna nú að vinna að því að aðlaga sig að þessu banni sem mun skapa mikla ringulreið seinnipartinn í dag og á morgun, bæði meðal flugfélaga og þeirra farþega sem eiga bókað flug til Bandaríkjanna.

Bannið hefur einnig áhrif á ferðaáætlun Icelandair sem hefur fyrirhugað yfir 500 brottfarir á þessu tímabili frá Keflavíkurflugvelli en fram kemur að um 27% af flugáætlun Icelandair á þessu tímabili sé áætlunarflug til Bandaríkjanna.

Tæknilega séð þá geta farþegar, sem eiga bókað flug frá Evrópulandi sem er á bannlista, flogið til Bretlands og bókað flug þaðan til Bandaríkjanna eða frá Evrópulandi til Kanada og bókað flug frá Kanada yfir landamærin til Bandaríkjanna.

Trump segir samt að allir þeir sem hafa dvalið lengur en í 14 daga í landi sem tilheyri Schengen-svæðinu fá ekki inngöngu inn í Bandaríkin á meðan á ferðabanninu stendur.