Isavia gefur út rafræna árs- og samfélagsskýrslu fyrir 2019

- Afkoma ársins 2019 jákvæð um 1.2 milljarða þrátt fyrir fækkun ferðamanna

3. apríl 2020

|

Frétt skrifuð kl. 13:56

Isavia hefur gefið út viðamikla rafræna árs- og samfélagsskýrslu sem nálgast má á isavia.is/arsskyrsla2019

Þrátt fyrir töluverða fækkun ferðamanna til landsins í fyrra þá var afkoma Isavia jákvæð um 1.2 milljarða króna en þetta kemur fram í ársuppgjöri sem fyrirtækið hefur birt.

Fram kemur að þrátt fyrir töluverða fækkun ferðamanna á síðasta ári var afkoma Isavia samstæðunnar jákvæð um 1,2 milljarða króna eftir skatta sem er lækkun um 3,1 milljarð króna frá fyrra ári.

Ef tekið er tillit til niðurfærslu á viðskiptakröfum vegna falls WOW air nemur lækkunin milli ára um 1,2 milljarði króna. Tekjur ársins lækkuðu um 3,3 milljarða, sem er um 8% samdráttur á milli ára. Handbært fé nam um 9,2 milljörðum króna í árslok 2019.

Þá kemur fram að farþegum um Keflavíkurflugvöll hafi fækkað um 26% á milli ára, en flugvélum sem fóru um íslenska úthafsflugstjórnarsvæðið fækkaði um 7,5 prósent. Þá fækkaði innanlandsfarþegum um 11,4%

 „Árið 2019 var fyrir margar sakir viðburðaríkt. WOW air féll á fyrri hluta ársins og stuttu síðar voru Boeing 737 MAX vélar Icelandair kyrrsettar. Allt hafði þetta mikil áhrif á fjölda farþega og þannig á rekstur samstæðu Isavia,“ segir Sveinbjörn Indriðason, forstjóri Isavia.

„Nú stöndum við frammi fyrir heimsfaraldri af völdum COVID-19 og það er gríðarmikil óvissa með framhaldið. Það eina sem við vitum er að áhrifin verða mikil. Fjárhagsleg staða félagsins er sterk en það er ljóst að við, eins og önnur fyrirtæki, þurfum að bretta upp ermarnar til að komast heil í gegnum þessa erfiðleika.“

Á aðalfundi Isavia voru kosin í aðalstjórn Orri Hauksson, Eva Pandora Baldursdóttir, Matthías Páll Imsland, Nanna Margrét Gunnlaugsdóttir og Valdimar Halldórsson.

Varastjórn skipa þau Sigrún Traustadóttir, Hreiðar Eiríksson, Ingveldur Sæmundsdóttir, Óskar Þórmundsson og Þorbjörg Eva Erlendsdóttir.

Árs- og samfélagsskýrsluvefur Isavia hefur nú verið opnaður en þar má finna samfélagsskýrslu Isavia fyrir árið 2019 en hún er einvörðungu gefin út á rafrænu formi sem má nálgast hér - www.isavia.is/arsskyrsla2019

Á vefnum er að finna ársreikning Isavia og helstu upplýsingar um rekstur félagsins á síðasta ári. Þá má þar einnig lesa um helstu áherslur Isavia í umhverfis- og samfélagsmálum. Farið er yfir helsta árangur félagsins árið 2019 og hvaða stefna hefur verið mörkuð í þeim efnum.