British Airways mun hætta með júmbó-þoturnar

- Ætla að taka Boeing 747-400 úr notkun fjórum áður fyrr en gert var ráð fyrir

5. apríl 2020

|

Frétt skrifuð kl. 16:06

Boeing 747 júmbó-þota British Airways í flugtaki á London Heathrow

Flugfélagasamsteypan International Airlines Group (IAG), móðurfélag British Airways auk fleiri flugfélaga, hefur ákveðið að Boeing 747 júmbó-þoturnar í flota British Airways skuli fara úr flotanum á næstunni allt að fjórum árum fyrr en gert var ráð fyrir.

Þetta kemur fram í yfirlýsingu frá Willie Walsh, framkvæmdarstjóra IAG, sem ávarpaði fjárfesta fyrirtækisins og er þetta hluti af hagræðingaraðgerðum vegna COVID-19.

Júmbó-þotur British Airways hafa verið eitt aðaleinkenni Heathrow-flugvallarins í London frá því á áttunda áratugnum og hafa vélarnar í marga áratugi verið einn helsti og traustasti vinnuhesturinn í flota félagsins.

IAG segir að samkvæmt greiningu á framhaldinu sem blasir við eftir að heimsfaraldinum lýkur þá er það mat fyrirtækisins að eftirspurn eftir flugsætum verði ekki það mikil og sé því óraunhæft að hafa taka allan flugflotan í notkun sem þýðir að elstu þoturnar verði teknar úr umferð.

Einhverjar þotur verða teknar úr notkun tímabundið með möguleika á því að þær verði notaðar aftur þegar eftirspurnin nær sér aftur á strik sem er óvíst hvenær verður en Walsh segir að verið sé að skoða hvaða þotur munu endanlega ljúka sínum líftíma og kveðja flotann fyrir fullt og allt og hverjar ekki.

Walsh segir að Boeing 747-400 júmbó-þoturnar munu sennilega kveðja flotann og verða afskrifaðar endanlega og það sama má segja um Airbus A340-600 breiðþoturnar sem eru í flota spænska flugfélagsins Iberia.

Júmbó-þotur British Airways við T5 flugstöðina á Heathrow-flugvellinum í London

British Airways hefur 31 júmbó-þotu í flotanum sem til stóð að nota áfram til ársins 2024 og má því áætla að þær séu að kveðja flotann fjórum árum fyrr en til stóð en meðalaldur þeirra eru 23 ár.

Þá kemur fram að mögulega muni IAG einnig taka nokkrar Airbus A330 breiðþotur úr flota írska flugfélagsins Aer Lingus sem munu heldur ekki snúa aftur í flotann en Aer Lingus hefur fjórar A330-200 breiðþotur sem hafa meðalaldur upp á 17.8 ár og ellefu Airbus A330-300 þotur.

Að lokum var tekið fram að IAG gæti einnig séð fram á að taka 20 minni farþegaþotur úr flota British Airways sem hafa verið notaðar að mestu leyti í flugi innan Evrópu.