Lufthansa Group sker niður - Losa sig við 42 flugvélar

- Hætta með nokkrar Airbus A380, Boeing 747-400 og Airbus A340-600 þotur

7. apríl 2020

|

Frétt skrifuð kl. 20:54

Lufthansa hefur um 300 flugvélar í sínum flugflota en öll dótturfélög Lufthansa Group hafa yfir 700 flugvélar

Lufthansa gerir ráð fyrir að það muni taka marga mánuði að aflétta ferðabanni í öllum löndum heimsins þegar heimsfaraldinum lýkur og gerir flugfélagið þýska ráð fyrir að eftirspurn eftir flugsætum muni ekki ná að verða sú sama og hún var fyrir tíma COVID-19 fyrr en eftir einhver ár.

Vegna þessa hefur stjórn Lufthansa Group ákveðið að grípa til harða aðgerða til þess að undirbúa sig að minna umfangi í rekstri og ætlar fyrirtækið meðal annars að losa sig við 42 þotur sem eiga ekki eftir að koma aftur í flotann.

Lufthansa er stærsta flugfélag Evrópu en dótturfélög Lufthansa Group hafa til samans yfir 700 flugvélar í sínum flota og mun sá floti því dragast saman sem nemur yfir 5 prósentum og verður fækkað í flota allra dótturfélaga.

Meðal flugvéla sem Lufthansa Group ætlar að losa sig við eru:

- Sex Airbus A380 risaþotur úr flota Lufthansa
- Sjö Airbus A340-600 breiðþotur
- Þrjár 340-300 breiðþotur
- Fimm júmbó-þotur af gerðinni Boeing 747-400
- Ellefu Airbus A320 þotur
- Tíu Airbus A320 þotur úr flota Eurowings

Flugvélar Lufthansa í geymslu vegna COVID-19

Airbus A380 risaþoturnar sex ætlaði Lufthansa hvort eð er að losa sig við árið 2022 og setja þær á sölu en eftir þetta mun fjöldi risaþotna í flota Lufthansa fara úr 14 risaþotum niður í átta.

Lufthansa hefur í dag 13 Boeing 747-400 þotur og verða því átta eftir í flotanum en félagið hefur einnig níutján júmbó-þotur af gerðinni Boeing 747-8 sem verða áfram.

Þá mun Lufthansa minnka umsvif sín á flugvöllunum í Frankfurt og í Munchen og þá verður einnig dregið úr umsvifum dótturfélagsins, Eurowings.

Þær viðsnúningsáætlanir sem hefur verið unnið eftir í tengslum við rekstur Austrian Airines og Brussels Airlines verður haldið áfram en aðgerðir hertar enn frekar til þess að ná enn meiri hagkvæmni í rekstri þeirra félaga en floti beggja félaganna verður einnig skorinn niður.

Þá verður einnig dregið úr umsvifum svissneska flugfélagsins SWISS International Air Lines og flugfloti þess verður smærri auk þess sem afhendingum á nýjum þotum verður slegið á frest.

Airbus-þotur SWISS International Air Lines sem er einnig dótturfélag Lufthansa Group

Lufthansa Group hefur einnig rift öllum leigusamningum er varðar blautleigu á þotum frá öðrum flugfélögum fyrir dótturfélög sín en fyrirtækið hafði marga slíka samninga til að halda úti áætlunarflugi ef skortur var á flugvélum.

Þá verður rekstri dótturfélagsins Germanwings hætt og öllu starfsfólki þess sagt upp en félagið annaðist meðal annars flugrekstur fyrir Eurowings en þess verður ekki þörf lengur og mun Germanwings því ekki fljúga aftur.