Uppsagnir 114 flugmanna hjá Icelandair dregnar til baka

16. júlí 2020

|

Frétt skrifuð kl. 16:01

Í flugstjórnarklefa á „Svörtuborgum“, Boeing 767-300ER breiðþotu Icelandair á Keflavíkurflugvelli

Icelandair stefnir á að draga til baka uppsagnir meðal 114 flugmanna hjá félaginu sem þýðir að 139 flugmenn munu starfa hjá félaginu frá og með næstu mánaðarmótum. Þetta er haft eftir Jóni Þóri Þorvaldssyni, formanni félags íslenskra atvinnuflugmanna (FÍA), samkvæmt fréttum Viðskiptablaðsins.

Icelandair sagði upp 421 flugmanni þann 28. apríl í vor vegna þeirra áhrifa sem fylgdu kórónaveirufaraldrinum og lagðist allt áætlunarflug Icelandair nánast af í framhaldinu af því í maí og í fyrri hluta júnímánaðar.

Frá og með 15. júní byrjaði félagið að auka fjölda flugferða á ný og hefja aftur áætlunarflug til valdra áfangastaða í Evrópu og hefur félagð nú flogið í um einn mánuð eftir að landamæri Íslands voru gerð aðgengilegri.

Erfiðlega hefur gengið fyrir flugfélög að setja saman langtímaflugáætlun þar sem markaðir eru mjög misjafnir og óvíst hvenær sum lönd opna aftur fyrir flugsamgöngur vegna heimsfaraldursins.

Jón Þór segir þetta vera góðar fréttir fyrir þá 139 flugmenn sem munu halda áfram að fljúga hjá félaginu en erfiðar fréttir fyrir þá 282 flugmenn sem munu ekki fá að starfið aftur á þessum tímapunkti en þeir munu missa vinnuna frá og með 1. ágúst næstkomandi.

Boeing 757 þota Icelandair á Keflavíkurflugvelli í október í fyrra

Aukning flugferða og eftirspurn eftir farmiðum til og frá landinu ræður að mestu för en ferðalög Íslendinga erlendis og erlendra ferðamanna hingað til lands eru ennþá takmarkaður miðað við sumarvertíðina sem ætti að vera í hæstu hæðum undir eðlilegum kringumstæðum og erfiðlega hefur gengið að spá fyrir um horfur næstu vikur og mánuði.

Vonuðust til að fleiri uppsagnir yrðu dregnar til baka

Þá hefur það haft mikil áhrif fyrir Icelandair að Bandaríkin eru enn nánast lokuð fyrir ferðamönnum vegna COVID-19 og má segja það sama um fleiri flugfélög sem fljúga til Ameríku.

Fram kemur að það hafi verið von FÍA að fleiri uppsagnir yrðu afturkallaðar vegna ríkulegs framlags flugmanna á ýmsum sviðum síðustu mánuði með vísan í útreikninga sem sýndu bæði þörf fyrir fleiri flugmenn og hagræði af því að afturkalla uppsagnir á sama tíma en sú varð ekki raunin.

Í dag eru 17 brottfarir áætlaðar frá Keflavíkurflugvelli og þar af átta brottfarir á vegum Icelandair sem eru flug til Oslóar, London Heathrow, Amsterdam, Frankfurt, Parísar auk þriggja flugferða til Kaupmannahafnar.