Starfsmenn Arkia Israeli Airlines mótmæla við heimili forstjórans

- Hvetja stjórnina til að taka við láni frá ísraelsku ríkisstjórninni

4. ágúst 2020

|

Frétt skrifuð kl. 08:50

Starfsmenn Arkia Israeli Airlines mótmæla bæði fyrir framan heimili forstjóra flugfélagsins og einnig við höfuðstöðvarnar

Yfir 500 starfsmenn ísraelska flugfélagsins Arkia Israeli Airlines hafa að undanförnu mótmælt bæði fyrir framan heimili forstjóra flugfélagsins og fyrir framan höfuðstöðvar félagsins en félagið hætti að fljúga í mars í vor og hafa flestir starfsmenn ekki fengið greidd laun síðan þá.

Stjórnarformenn félagsins neita að taka við aðstoðarpakka frá ísraelska ríkinu en ríkisstjórn landsins hefur boðið Arkia Israeli Airlines að fá lán upp á 5.4 milljarða króna og mótmæla starfsmenn félagsins því að eigendurnar hafa hafnað að taka við þeirri aðstoð.

Þar sem forsvarsmenn flugfélagsins vilja ekki taka við aðstoð þá óttast starfsmenn félagsins að dagar Arkia Israeli Airlines séu taldir og að eigendurnir ætli að setja félagið í þrot og stöðva reksturinn.

Yishai Meller, flugstjóri hjá félaginu hvetur eigendurnar að taka við láninu
og koma flugvélunum aftur í loftið

Yishai Meller, flugstjóri hjá flugfélaginu, kom fram í sjónvarpsviðtali á ísraelsku fréttastöðinni i24NEWS en hann flaug seinast þann 12. mars og var eftir það gert að taka sér launalaust leyfi eins og aðrir starfsmenn.

Hafa ekkert heyrt frá eigendunum frá því í mars

„Að einhverjum ástæðum hafa eigendurnir hafnað þessu boði og þeir eru ekki í neinum samskiptum við starfsmenn sína varðandi framhaldið og hefur engin heyrt neitt frá þeim síðan í mars“, segir Yishai sem hvetur stjórn Arkia til þess að taka við láninu frá ríkisstjórninni líkt og önnur flugfélög í landinu hafa gert.

Yishai segir að starfsmenn séu tilbúnir að taka á sig verulega launalækkun til þess að hægt sé að koma rekstrinum af stað aftur og koma flugvélunum aftur á loft og segir Yishai að eins og staðan er í dag lifa um 540 fjölskyldur í mikilli óvissu með framhaldið.

„Við erum eina ísraelska flugfélagið sem er ekki að fljúga. Allar flugvélar hjá öðrum flugfélögum í landinu eru byrjuð að fljúga aftur“, segir Yishai sem er sannfærður um að flugið eigi eftir að verða aftur með eðlilegum hætti eftir kórónaveirufaraldurinn.

Arkia Israeli Airlines hefur nýlega tekið við þremur nýjum þotum beint frá Airbus af gerðinni Airbus A321LR auk sem leystu af hólmi Boeing 757 þoturnar en þá hefur félagið einnig fjórar Embraer-þotur af gerðinni E190 og E195 auk þess sem félagið á von á sinni fyrstu Airbus A330-800neo breiðþotu.

Flugvélar Arkia Israeli Airlines hafa verið kyrrsettar frá því um miðjan mars