Helmingur farþega sótti farangur við neyðarrýmingu

- Flugfreyja skipaði neyðarrýmingu án þess að tala við flugmennina

6. ágúst 2020

|

Frétt skrifuð kl. 22:17

Flugvélin var á leið í flugtak frá London Stansted til Vín í Austurríki þegar bilun kom upp í öðrum hreyflinum

Tafir urðu á því að hægt var að rýma farþegaþotu á Stansted-flugvellinum í London í fyrra er upp kom neyðarástand vegna fjölda farþega sem eyddu tíma í að sækja handfarangur sinn.

Þetta kemur fram í skýrslu frá rannsóknarnefnd flugslysa í Bretland en haft er eftir sjónarvottum að um helmingur þeirra 169 farþega sem voru um borð í flugvélinni fóru að vitja farangurs bæði úr handfarangursgeymslum og undir sætunum í stað þess að koma sér strax út og niður um neyðarrennibrautir.

Nokkrir farþegar sögðu að þeir hefðu ekki náð að yfirgefa vélina strax þar sem gangurinn var stíflaður af farþegum sem voru að sækja handfarangurstöskur þrátt fyrir að fjöldi farþega kölluðu til þeirra að koma sér út og skilja farangurinn eftir.

Atvikið átti sér stað þann 1. mars í fyrra og var um að ræða farþegaþotu af gerðinni Airbus A320 frá Laudamotion sem var í flugtaki á leið til Vín í Austurríki þegar bilun kom upp í öðrum hreyfli vélarinnar.

Samkvæmt reglugerðum í fluginu þá verður að vera hægt að rýma farþegaflugvél á 90 sekúndum ef upp kemur neyðarástand. Rannsóknaraðilar eru ekki vissir um hversu langan tíma tók að rýma flugvélina í þessi tilviki en mögulega var rýmingarferlið „frekar hægt“.

Á myndinni má sjá nokkra farþega með farangur og einnig má sjá eina tösku liggja á flugbrautinni

Breska flugslysarannóknarnefndin segir að vandamál sem þessi séy ekki ný af nálinni og verði þetta enn vandamál í framtíðinni ef ekki er gripið til aðgerða til að koma í veg fyrir að farþegar séu að taka með sér handfarangur þegar verið er að rýma flugvél í neyðartilviki.

Einnig kemur fram að flugmenn vélarinnar vissu ekki af því að neyðarrýming væri í gangi fyrr en þeir sáu að hópur farþega var komin út á flugbrautina. Hugðust þeir færa flugvélina af brautinni en ein flugfreyjan um borð skipaði öllum að fara frá borði án þess að ræða við flugmennina.

Farþegar í hættu þar sem þeir stóðu við hreyfil sem var í gangi

Í skýrslunni segir að flugfreyjan hafi verið óreynd, hlotið lélega þjálfun og átti hún í vandamálum með samskipti við aðra í áhöfninni. „Hún var í áfalli eftir að hafa heyrt hvell koma frá hreyflinum og skipaði hún öllum að rýma vélina án þess að tala við neinn í stjórnklefanum“, segir í skýrslunni.

Í ljós kom að nokkrir farþegar voru í mikilli hættu þar sem annar hreyfilinn var enn í gangi þar sem flugmennirnir ætluðu sér að nota aflið frá honum til að aka að stæði.

Bilunin í hreyflinum er rakin til þess að nokkur hreyflablöð höfðu losnað vegna íhluts sem var ekki festur nægilega vel.