Kenna flugumferðarstjórum um Kobe Bryant flugslysið

- Island Express Helicopters höfðar mál gegn tveimur flugumferðarstjórum

27. ágúst 2020

|

Frétt skrifuð kl. 18:07

Þyrlan með Kobe Bryant fórst þann 26. janúar á þessu ári

Þyrlufyrirtækið og flugrekandi þyrlu af gerðinni Sikorsky S-76B, sem fórst í janúar á þessu ári með fyrrum L.A. Lakers körfuboltastjörnunni Kobe Bryant um borð auk átta annara með þeim afleiðingum að allir létu lífið, hefur höfðað mál gegn tveimur flugumferðarstjórum í Los Angeles og kennir fyrirtækið flugumferðarstjórunum um slysið.

Það er fyrirtækið Island Express Helicopters sem átti þyrluna sem fórst er hún brotlenti í hlíðum nálægt San Fernando dalnum í þoku og mjög lélegu skyggni þann 26. janúar síðastliðinn.

Í málsgögnum, sem hafa verið send inn til dómsstóla í Los Angeles, telur þyrlufyrirtækið að flugumferðarstjórar hafi láðst að veita flugmanni þyrlunnar áframhaldandi sjónsflugsfyrirmæli skömmu fyrir slysið og telur fyrirtækið að ábyrgðin hafi verið í höndum tveggja flugumferðarstjóra.

Í göngum fullyrðir fyrirtækið að það hafi verið mistök af flugumferðarstjórunum að neita þyrluflugmanninum um frekari þjónustu á þeim forsendum að hann væri að hverfa af ratsjá bráðlega og að fjarskiptasambandið væri að rofna innan skamms en flugmanninum var gert að skipta um kvakmerki og hafa samband „fljótlega“ við flugumferðarstjórana í Camarillo.

Í málsgöngum segir að sú staðreynd að þyrluflugmaðurinn náði að hafa samband við flugumferðarstjórana aftur fjórum mínútum síðar og að ratsjársvarinn var enn senda upplýsingar sanni það að flugvélin var enn sýnileg á ratsjá og skilaboð flugumferðarstjóranna til flugmannsins um að þyrlan væri að hverfa af ratsjá hafi verið þvættingur.

Vill Island Express Helicopter því meina að áframhaldandi þjónusta frá flugumferðarstjórunum hefði getað komið í veg fyrir slysið og segir í málsgögnum að flugmaðurinn hafi orðið stressaður og álagið aukist til muna er honum var tilkynnt að þeir myndu enda frekari sjónflugsleiðbeiningar og segir að þeir hafi því skilið þyrluna eftir án flugleiðsögu við mjög varasamar aðstæður.

Island Express Helicopters hefur sjálft fengið á sig fjórar kærur vegna slyssins frá aðstandendum þeirra sem voru um borð í þyrlunni og þar á meðal frá eiginkonu Kobe Bryants sem hefur höfðað mál gegn þyrlufyrirtækinu.