Þörf á 8.000 júmbó-fraktþotum til að dreifa bóluefni til heimsins

- IATA undirbýr sig fyrir stærsta fraktflugsverkefni í sögu flugsins

10. september 2020

|

Frétt skrifuð kl. 14:03

Um verður að ræða eitt stærsta fraktflugsverkefni í sögu flugsins þegar bóluefni við COVID-19 kemur á markaðinn

Því er spáð að það þurfi allt að 8.000 stórar fraktþotur á borð við júmbó-þotuna Boeing 747 til þess að dreifa bóluefni við COVID-19 um alla heimsbyggðina þegar slíkt bóluefni kemur á markaðinn og þarf hver jarðarbúi aðeins að fá einn skammt af bóluefninu en mannkynið telur í dag 7.8 milljarðar jarðarbúa.

Um er að ræða eitt stærsta fraktverkefni í sögu flugsins er kemur að einni einstakri vöru og hafa Alþjóðasamtök flugfélaganna (IATA) nú þegar hafið undirbúning til að tryggja öruggan flutning til allra staða í heiminum þótt að vísindamenn séu ekki tilbúnir með bóluefnið.

IATA er þegar byrjað að ráðfæra sig við flugvelli víðsvegar um heiminn og hafið viðræður við flugfélög varðandi hvernig best sé að undirbúa þetta stóra verkefni og þá er stofnunin einnig í samvinnu við þau lyfjafyrirtæki sem vinna að þróun bóluefnisins svo hægt sé að tryggja örygga fraktflutninga þegar að því kemur.

Að flytja bóluefni við COVID-19 verður mun meira krefjandi en margan skyldi gruna og eru ekki allar farþegaflugvélar sem henta í slíkt verkefni þar sem mjög vandlega þarf að huga að stjórnun á hitastigi í fraktrýminu. Í einhverjum tilfellum þarf til að mynda að viðhalda hitastigi á bilinu 2 til 8°C gráður og önnur bóluefni gætu þurft að vera í frystu fraktrými.

„Að afhenda bóluefnið verður „sendiför 21. aldrarinnar“ fyrir fraktflugsiðnaðinn í heiminum en það mun ekki nást nema með mjög góðum undirbúningi. Tíminn til að undirbúa þetta er akkurat núna“, segir Alexandre de Juniac, framkvæmdarstjóri IATA.

Boeing 747 fraktþota frá Air Atlanta Icelandic

„Þótt að hægt væri að flytja helminginn af bóluefninu landleiðina þá væri samt sem áður um að ræða stærsta fraktflugsverkefni í sögunni“, segir Alexandre.

IATA er meðal annars að skoða hvernig hægt verði að fljúga með bóluefni til einstakra svæða í heiminum þar sem aðstæður eru mjög krefjandi og erfiðar á borð við suðausturhluta Asíu og til Afríku og þá eru sum lönd þar sem erfitt verður að komast yfir landamæri til að ná til nærliggjandi svæða ef viðunandi flugvöllur fyrir stórar flugvélar er staðsettur í öðru landi.

IATA hvetur ríkisstjórnir til þess að byrja að undirbúa móttöku efnisins og sérstaklega í þeim löndum þar sem sem ríkja deilur og er tekið fram að tryggja þarf að frakflug til þeirra svæða séu öruggar gagnvart þjófnaði eða hindrun á flutningum.

Fram kemur að um 180 mismunandi bóluefni við COVID-19 séu í þróun í heiminum og séu þróun þeirra flestra á byrjunarstigi en að minnsta kosti 35 bóluefni eru komin á tilraunastig.