IATA: Skimun fyrir brottför eina lausnin til að bjarga fluginu

- Leggja til að samdæmd skimun fari fram á helstu flugvöllum heimsins

22. september 2020

|

Frétt skrifuð kl. 18:31

Alexandre de Juniac, formaður IATA, segir að núverandi sóttvarnir og reglur um sóttkví séu að drepa flugiðnaðinn

Alþjóðasamtök flugfélaganna (IATA) segja að eina leiðin til að binda endi á núverandi ástand í fluginu, og koma áætlunarflugi á milli landa aftur í gang, sé að skima alla farþega á flugvöllum fyrir kórónaveirunni áður en þeir fara um borð í flug.

Þetta segir Alexandre de Juniac, formaður IATA, sem fer fram á að ríki heimsins taki þessa hugmynd til skoðunar og komi upp samræmdri skoðun sem skráð er inn í gagnagrunn svo hægt sé að hefja skimanir á öllum farþegum fyrir brottför.

IATA segir að þetta sé eina lausnin til þess að laga ástandið og binda endi á þá lömun sem átt hefur sér stað í millilandaflugi í heiminum en Alexandre segir að núverandi sóttvarnarreglur séu að „drepa iðnaðinn“ og hindra bataferlið í fluginu.

„Ef litið er á tölurnar frá því að mörg lönd byrjuðu að opna að einhverju ráði landamæri sín þá hefur bataferlið er varðar áætlunarflug í heiminum valdið verulegum vonbrigðum. Millilandaflug í heiminum í júlí var aðeins 8% af því sem var í júlí í fyrra“, segir Alexandre.

Alexandre segir að ekki séu mörg merki um að ástandið eigi eftir að lagast vegna þeirrar annarrar bylgju faraldursins sem ríður nú yfir heimsbyggðina.

IATA telur að eina leiðin til að koma áætlunarflugi á milli landa aftur í gang sé að skima alla farþega fyrir brottför

Samkvæmt könnun sem gerð var þá voru um 83% ferðamanna og farþega sem svöruðu að þeir ætla ekki að ferðast á meðan reglur um sóttkví eru í gildi í viðkomandi landi - „Þetta sýnir að flugiðnaðurinn mun ekki ná sér nema að við finnum aðrar lausnir“.

IATA ætlar sér að vinna með Alþjóðaflugmálastofnuninni (ICAO) í samstarfi við heilbrigðisyfirvöld til að hrinda af stað drögum að skimunum fyrir farþega fyrir brottför á helstu flugvöllum heimsins svo þeir geti fengið það staðfest hvort þeir séu smitaðir af COVID-19 eður ei og farið því áhyggjulausir um borð án þess að þurfa að fara í sóttkví á áfangastað. IATA segir að til standi að vinna að þessu mjög hratt svo hægt verði að finna lausn sem fyrst.

IATA segir að mögulega væri hægt að framkvæma slíkar skimanir fyrir litlar 1.200 krónur sem væri greitt af yfirvöldum í hverju landi fyrir sig og gætu farþegar fengið niðurstöður innan 15 mínútna.

Alexandre minnir á að yfir 65 milljónir starfa eru í húfi í heiminum sem tengjast flugiðnaðinum og að flugið sé grundvöllur fyrir því að halda uppi óskertum efnahagi og væri skimun á öllum flugvöllum lausn að því að binda endi á lokanir og ferðatakmarkanir sem eru að verða pína fyrir fólk og efnahagslífið um allan heim.