Brandenburg-flugvöllur formlega tekinn í notkun í dag

- Airbus A320neo þotur frá easyJet og Lufhansa fyrstar til að lenda

31. október 2020

|

Frétt skrifuð kl. 19:42

Slökkviliðsbílar mynduðu heiðursboga fyrir Airbus A320neo þoturnar tvær frá easyJet og Lufthansa sem voru fyrsta til þess að lenda á Brandenburg-flugvellinum eftir opnunina

Nýi Brandenburg-flugvöllurinn í Berlín var formlega opnaður í dag og tekinn í notkun næstum því 10 árum á eftir áætlun.

Það var Airbus A320neo þota frá easyJet sem var fyrsta flugvélin til þess að lenda á Brandenburg-flugvelli eftir opnunina í dag og í kjölfarið lenti Airbus A320neo þota frá Lufthansa, flug LH2020, sem kom frá Munchen.

Upphaflega stóð til að vélar easyJet og Lufthansa myndu lenda samtímis hlið við hlið á sitthvorri flugbrautinni en vegna slæms veðurs þurfti að hætta við þau áform.

Dagurinn í dag er dagur sem margir Þjóðverjar héldu að myndi aldrei renna upp þar sem búið var að fresta opnun Brandenburg-flugvallarins svo oft að á tímabili var hætt við að gefa út fleiri opnunardagsetningar þar sem erfitt reyndist að standa við þær.

Flugvélar easyJet og Lufthansa í lendingu á Brandenburg
flugvelli í dag

Framkvæmdarstjórar easyJet og Lufthansa voru um borð í sitthvorri flugvélinni en þessi tvö flugfélög verða þau umsvifamestu á flugvellinum nýja.

Á meðan easyJet flaug frá Munchen með Carsten Spohr, framkvæmdarstjóra félagsins um borð, auk 40 annarra boðsgesta þau flaug þota easyJet mun styttri vegalengd þar sem hún hóf sig á loft frá Tegel-flugvellinum í Berlín sem er staðsettur í 26 kílómetra fjarlægð norðvestur af Brandenburg-flugvelli en flugvélinni var sérstaklega flogið til Tegel-flugvallarins frá London Gatwick sl. fimmtudag fyrir opnunarflugið.

Umhverfissinnar mótmæltu

Mótmæli meðal umverfissinna settu blett á opnunardaginn þar sem hópur samtakanna „Stay on the Ground“ kom sér saman inni í flugstöðinni auk þess sem einhverjir klifruðu upp á þakið á flugstöðinni og þurfti að kalla kalla til lögreglu til að fjarlægja mótmælendur af þakinu.

Fyrsta áætlunarflugið á Brandenburg-flugvellinum lenti síðan nú undir kvöld sem var flug á vegum easyJet sem kom frá Fuerteventura á Kanaríeyjum. Fyrsta brottförin verður síðan í fyrramálið sem er flug easyJet til London Gatwick en þá mun Qatar Airways og Turkish Airlines einnig byrja að fljúga um BER á morgun.

Mótmælendur komu sér fyrir inni í flugstöðinni í dag

Þá mun áætlunarflugferðum fjölga jafnt og þétt næstu daga og vikur og fleiri flugfélög bætast í hópinn en til að mynda mun Air France byrja að fljúga um BER þann 8. nóvember næstkomandi og færa sig af Tegel-flugvellinum í Berlín sem lokar sama dag.

Farið um borð í þotu easyJet fyrir hið stutta flug frá Tegel-flugvelli yfir til nýja Brandenburg-flugvallarins