Vara við ýmsum áhættum þegar flugvélar eru teknar úr geymslu

- Auðvelt að yfirsjást atriði við skoðun og einhverjir flugmenn orðnir „ryðgaðir“

15. desember 2020

|

Frétt skrifuð kl. 20:06

Talið er að allt að 2/3 allra farþegaflugvéla í heiminum hafi verið á einhverjum tímapunkti í geymslu vegna heimsfaraldursins

Flugfélög eru vöruð við því að fara sérstaklega varlega þegar kemur að því að koma flugvélum aftur í loftið sem hafa verið í geymslu vegna heimsfaraldursins og eru mestar áhyggjurnar er varðar hæfni flugmanna, sem hafa ekki flogið í einhvern tíma, og viðhaldsskoðun meðal flugvirkja.

Flugmálayfirvöld, tryggingarfyrirtæki, sérfræðingar í fluginu og fleiri samtök hafa beðið flugfélög um að gefa öllu viðhaldi og skoðunum sérstakan gaum þar sem auðvelt getur verið að yfirsjást einhver atriði sem eru ábótavant við viðhaldskoðun áður en flugvél er undirbúin fyrir áætlunarflug að nýju en einhver dæmi eru til að mynda um að skordýr hafi fundist í viðkvæmum búnaði sem getur haft afleiðingar í för með sér.

Fram kemur að tilkynnt hefur verið um fjölmörg vanamál sem hafa komið í ljós á þeim flugvélum sem hafa verið teknar úr geymslu en talið er að um 2/3 af flugflota heimsins sé í geymslu eða hafi verið í geymslu á einhverjum tímapunkti.

Alþjóðasamtök flugfélaganna (IATA) segja að nokkur dæmi séu meðal annars um að tilkynnt hafi verið um óstöðugt aðflug og vandamál sem hafa komið upp rétt fyrir lendingu sem rakið er til færni flugmanna og hafa eigendur flugvéla og tryggingaraðilar spurt sig þeirra spurninga hvort að flugfélög séu að einblína nógu vel á þjálfun flugmanna og þá sérstaklega er kemur að lendingum.

Margar flugvélar sem hafa verið færðar í geymslu munu ekki snúa aftur og þá sérstaklega eldri flugvélar

Gary Moran, yfirmaður yfir asíska tryggingarfyrirtækinu Aon PLC, segir fyrirtæki vilja fá að vita hver staðan er á þjálfun flugmanna sem snúa aftur eftir langt hlé og segir hann að aðflug og lendingar sé það sem flestir hafa áhyggjur af - „Það er fólk sem er að snúa aftur til starfa sem er orðið „ryðgað“ í því sem var áður rútína. Það er stórt vandamál“, segir Moran.

Þá hefur evrópsk flugmálayfirvöld (EASA) fengið inn á borð til sín nokkur mál er varðar óáreiðanlegan flughraða sem rakið er til aðskotahluta í stemmuröri („pitot tubes“) þar sem skordýr hafa meðal annars stíflað tiltekið rör sem skynjar áfallsþrýsting og tengist nokkrum mælum í stjórnklefa flugvéla en flest slík tilfelli hafa komið upp snemma eftir að flugvél er tekin úr geymslu og fer aftur í umferð.

„Við erum á ókunnugum slóðum núna og iðnaðurinn þarf að taka sérstakt skref til að lágmarka áhættuna en jafnframt að búa sig undir hið óvænta“, segir Kate Seaton, hjá flugráðgjafarfyrirtækinu HFW.

Flugvélar frá British Airways í geymslu vegna heimsfaraldursins

Þá hefur EASA einnig greint frá atvikum sem hafa átt sér stað nýverið þar sem flugmenn hafa þurft að slökkva á hreyflum vegna vandamála, aðskotahlut í eldsneytiskerfi, lágan þrýsting í bremsukerfi í hjólabúnaði auk þess sem rafhlöður hafa misst hleðslu.

Peter Meiresonne hjá Alþjóðasamtökum félags atvinnuflugmanna segir að flugmenn verið einnig að vera duglegir að meta sína eigin hæfni þegar þeir snúa aftur til starfa og verði þeir meðal annars að huga þeim þætti flugsins sem snýr að aðflugi og lendingum og hætta við lendingar ef þeir telja sig ekki vera undirbúnir fyrir aðstæður hverju sinni og sérstaklega er lokastefnan er stutt.

„Núna er kannski rétti tíminn til að segja við flugumferðarstjóra: „Við erum ekki tilbúnir“ eða „getum við fengið 6 eða 10 mílna aðflug í stað fjögurra“ sem er eitthvað sem þú myndir þiggja ef þú værir búinn að fljúga í einhvern tíma“, segir Meiresonne.