Boeing staðráðið í að koma með 797 á markaðinn

- Segja að unnið hafi verið að undirbúningi þotunnar þrátt fyrir COVID-19

2. febrúar 2021

|

Frétt skrifuð kl. 22:56

Boeing hefur kynnt nýju farþegaþotuna sem „New Midsize Aircraft“ en talið er að þotan muni fá heitið Boeing 797

Boeing segist vera staðráðið í að halda áfram með þau áform sem gerð hafa verið varðandi þróun á nýrri farþegaþotu sem er ætlað að leysa af hólmi það skarð sem Boeing 757 skildi eftir sig.

Eins og margir kannast við er um að ræða þotu sem fengið hefur viðurnefnið Boeing 797 og var þegar farið að gera áætlanir varðandi þessa þotu árið 2017 með uppsetningu á sérstakri deild sem samanstendur af verkfræðingum og hönnuðum en upphaflega var farið að ræða þessar hugmyndir fyrir meira en áratug síðan.

Árið 2018 var byrjað að kynna þotuna fyrir áhugasömum viðskiptavinum og hefur þotan hingað til eingöngu verið kynnt af Boeing sem „New Midsize Aircraft“ (NMA) en komið hefur í ljós að þotan á líklega eftir að verða þekkt sem Boeing 797 þrátt fyrir að Boeing hefur ekki gefið það enn út opinberlega.

Verkefnið hefur ekki verið mikið í umræðunni frá því í fyrra vegna heimsfaraldursins en David Calhoun, framkvæmdarstjóri Boeing, tók það fram nýlega að fyrirtækið sé reglulega að vinna að undirbúningi fyrir framleiðslu þotunnar sem gæti komið á markað síðar á þessum áratug eða fyrir árið 2030.

Calhoun nefnir að mögulega gæti nýja farþegaþotan komið á markað árið 2026 en þróun á nýrri tækni gæti verið uppfærð reglulega á næstu fimm árum svo að þotan verði útbúin öllum helstu nýjungum sem völ er á þegar hún kemur á markað.

Boeing 787 er ætlað að fylla í skarðið á milli stærstu Boeing 737 MAX þotunnar sem er 737 MAX 10 og minnstu Dreamliner-þotunnar sem er Boeing 787-8.

Boeing 797 mun meðal annars fylla upp í skarðið sem Boeing 757 skildi eftir sig þegar framleiðslu hennar var hætt árið 2004

Boeing 787 verður breiðþota sem kemur með tveimur göngum og er talið að hún gæti tekið allt að 270 farþega í sæti og haft flugþol upp á 11 klukkustundir

Philippe Petitcolin, framkvæmdarstjóri fyrirtækisins Safran, sem framleiðir íhluti fyrir flugvélar frá Boeing og fyrir fleiri flugvélaframleiðendur, segir að árangur endurkomu Boeing 737 MAX þotunnar á markaðinn eftir kyrrsetningu gæti spilað inn í varðandi hvenær Boeing fer á fullt skrið með framleiðslu á Boeing 797.

Boeing 797 verður fyrsta þotan sem Boeing mun hanna frá grunni frá því að tilkynnt var um Dreamliner-þotuna árið 2004 en árið 2019 var talið að þörf væri fyrir 4.000 til 5.000 farþegaþotur í heiminum á næstu 20 árum í þeim stærðarflokki sem Boeing 797 mun tilheyra sem sameinar stærðarflokka Boeing 757 og Boeing 767.