flugfréttir

Tvö atvik þar sem brak úr hreyflum féll til jarðar

- Bilun kom upp skömmu eftir flugtak í Denver og einnig í Hollandi

21. febrúar 2021

|

Frétt skrifuð kl. 13:37

Þotan fór í loftið frá flugvellinum í Denver í Bandaríkjunum í gær um kl. 20:05 að íslenskum tíma

Dagurinn í gær má teljast frekar undarlegur í fluginu þar sem upp komu tvö atvik beggja megin Atlantshafsins þar sem bilanir komu upp í hreyflum í flugtaki hjá tveimur flugvélum sem varð til þess að brak féll til jarðar, annars vegar í Denver í Bandaríkjunum og hinsvegar nálægt Maastricht í Hollandi.

Í Bandaríkjunum var um að ræða bilun sem kom upp í hreyfli á breiðþotu af gerðinni Boeing 777-200 hjá bandaríska flugfélaginu United Airlines í gær skömmu eftir flugtak frá flugvellinum í Denver í Bandaríkjunum.

Þotan var á leið til Honolulu á Hawaii-eyjum með yfir 230 farþega innanborðs þegar alvarleg bilun kom upp í hægri hreyfli vélarinnar sem flokkast sem bilun sem á ensku nefnist  „uncontained engine failure“ sem þýðir að brak sem losnar verður ekki eftir inni í hreyflinum eins og þeir eru hannaðir til í þeim tilgangi að hlífa skrokk vélarinnar.

Brak úr hreyflinum auk hreyflahlífar losnaði í þessu tilviki og féll til jarðar og hafnaði umgjörð af hreyflahlífinni við inntak hreyfilsins í görðum einbýlishúsa í úthverfi Denver og hafa myndir af brakinu farið eins og eldur um sinu á samfélagsmiðlum og á fréttavefsíðum víða um heim.

Atvikið átti sér stað um kvöldmatarleytið í gær en þotan fór í loftið frá Denver klukkan 20:05 að íslenskum tíma og lýstu flugmennirnir yfir neyðarástandi þegar þotan var komin í 13.000 feta hæð og fengu flugmennirnir leyfi til þess að lenda á hvaða braut sem hentaði best á flugvellinum í Denver.

Þotan lenti giftusamlega í Denver um 23 mínútum eftir flugtakið og staðnæmdist flugvélin á brautinni þar sem neyðarteymi og slökkviliðsbílar biðu vélarinnar og slökktu eld sem var laus í hreyflinum.

Skjáskot af myndbandi sem farþegi um borð í flugvélinni tók af hreyflinum

Myndabandi af hreyflinum sem farþegi um borð tók hefur verið dreift víða og sést þar hvar stór hluti af hreyflahlífinni hefur rifnað af auk þess sem töluverðan eld má sjá aftast í brunahólfi hreyfilsins.

Fram kemur að töluvert af braki hafi rignt niður yfir Broomfield-hverfinu og hafi það hafnað við nokkur íbúðarhús í einni götu hverfisins auk þess sem stórir hlutar af hreyflahlífinni hafi lent á fótboltavelli í nágrenninu. Engan sakaði hvorki á jörðu niðri né meðal þeirra sem voru um borð í flugvélinni.

Sjónarvottar á jörðu niðri sögðust meðal annars hafa heyrt hljóð frá sprengingu og segir einn sem varð vitni að atvikinu að hann hafi litið upp til himins og séð brak falla til jarðar frá flugvél sem hélt áfram að fljúga.

Bandarísk flugmálayfirvöld (FAA) hafa gefið frá sér yfirlýsingu þar sem fram kemur að rannsókn á atvikinu sé hafin og kemur samgönguöryggisnefnd Bandaríkjanna (NTSB) einnig að rannsókninni.

Brak úr hreyfli á Boeing 747 féll til jarðar eftir flugtak frá Maastricht

Í Hollandi var um að ræða júmbó-fraktþotu af gerðinni Boeing 747-400BCF frá fyrirtækinu Longtail Aviation sem var nýfarin í loftið frá flugvellinum í Maastricht á leið til John F. Kennedy flugvallarins í New York í Bandaríkjunum.

Upp kom sambærileg bilun í einum af fjórum hreyflum þotunnar og var einnig um að ræða bilun sem flokkast sem „uncontained engine failure“ og féll brak og þar á meðal brot úr hreyflablöðum til jarðar í bænum Meerssen en þá var þotan í klifri í 1.400 feta hæð.

Brak sem lenti ofan á bíl í bænum Meerssen í gær

Flugmenn vélarinnar lýstu einnig yfir neyðarástandi og þurfi flugvélin að hringsóla til að losa sig við eldsneyti til að ná lendingarþunga vélarinnar niður fyrir viðunandi mörk og var ákveðið að lenda á Liege-flugvellinum í Belgíu þar sem sá flugvöllur hefur lengri flugbraut.

Í fréttum kemur fram að brak hafi hafnað á bílum auk þess sem tveir einstaklinga urðu fyrir braki og hlutu minniháttar meiðsl af og var einn fluttur á sjúkrahús til aðhlynningar.

Lögreglan varaði fólk við því að snerta brakið

Lögreglan í Hollandi sendi frá sér yfirlýsingu þar sem fólki var varað við því að snerta brakið og tilkynna það frekar til lögreglu.

Júmbó-þotan er um 30 ára gömul og var hún áður í flota Singapore Airlines, Air India, Air Cargo Germany og hjá Ruby Star Airways áður en hún fór í flugflota Longtail Aviation.

Fleiri myndir frá atvikinu í Bandaríkjunum:





















  fréttir af handahófi

Starfsmenn fá bónusgreiðslur þrátt fyrir gríðarlegt tap

3. febrúar 2021

|

Þrátt fyrir að árið 2020 hafi verið mjög erfitt ár hjá Boeing þá segir flugvélaframleiðandinn að starfsmenn fyrirtækisins munu samt sem áður fá bónusgreiðslur greiddar út í mars.

Gera þriðju tilraun til þess að selja vörumerki Adria Airways

29. desember 2020

|

Gjaldþrotastjórn slóvenska flugfélagsins Adria Airways reynir nú að gera þriðju tilraun til þess að selja merki og markaðsímynd flugfélagsins sem varð gjaldþrota í september í fyrra.

Ryanair sakar franska ríkið um að mismuna lágfargjaldafélögum

15. febrúar 2021

|

Ryanair hefur ítrekað óánægju sína yfir ákvörðun frönsku ríkisstjórnarinnar um að veita frekari fjárhagslega aðstoð til Air France og segir félagið að lítið sem ekkert sé gert til að koma til móts v

  Nýjustu flugfréttirnar

Fyrsta flug Singapore Airlines með Boeing 737 í 25 ár

5. mars 2021

|

Singapore Airlines hefur hafið aftur áætlunarflug með Boeing 737 þotum eftir 25 ára hlé en félagið hefur eingöngu verið með stórar breiðþotur í flota sínum sl. ár.

Norwegian hættir við 737 MAX

4. mars 2021

|

Norska lágfargjaldarfélagið Norwegian hefur ákveðið að hætta alfarið með Boeing 737 MAX þoturnar og halda sig einungis við Boeing 737-800.

Versta ár í sögu Lufthansa

4. mars 2021

|

Þýska flugfélagið Lufthansa hefur aldrei í 68 ára sögu flugfélagsins orðið fyrir eins miklu tekjutapi líkt og í fyrra en Lufthansa Group tilkynnti í morgun afkomu fyrirtækisins fyrir árið 2020.

Flyr undirbýr sig fyrir samkeppni í Noregi

3. mars 2021

|

Nýja norska sprotaflugfélaginu Flyr hefur tekist að safna um 8.8 milljörðum króna í stofnfé eftir hlutafjárútboð sem fram fór í Ósló og stefnir félagið á að hefja farþegaflug í sumar.

Austrian finnur kaupanda að þremur Boeing 767 þotum

3. mars 2021

|

Austurríska flugfélaginu Austrian Airlines hefur tekist að finna kaupanda að þeim þremur Boeing 767-300ER breiðþotum sem félagið hefur reynt að selja.

Konum í flugnámi fer fjölgandi

2. mars 2021

|

Nemendum við Flugakademíu Íslands fer enn fjölgandi en 268 nemendur stunda nú nám við skólann. Þar af leggja flestir stund á atvinnuflugmannsnám eða 231. Fjórðungur nemenda skólans eru konur en hefur

Sérstök viðurkenning fyrir hreinlæti á Covid-tímum

2. mars 2021

|

Keflavíkurflugvöllur er í hópi með 15 öðrum flugvöllum í Evrópu sem hljóta sérstaka viðurkenningu Alþjóðasamtaka flugvalla (ACI) fyrir hreinlæti á síðasta ári.

United pantar 25 Boeing 737 MAX þotur til viðbótar

1. mars 2021

|

Bandaríska flugfélagið United Airlines hefur lagt inn nýja pöntun til Boeing í 25 farþegaþotur til viðbótar af gerðinni Boeing 737 MAX.

Köttur réðst á flugstjóra í stjórnklefa á Boeing 737 þotu

1. mars 2021

|

Þota af gerðinni Boeing 737 þurfti að snúa við til Khartoum í Súdan í seinustu viku eftir að köttur réðst á flugstjóra í stjórnklefa vélarinnar skömmu eftir flugtak.

Kínverjar ekki tilbúnir að leyfa 737 MAX að fljúga strax

1. mars 2021

|

Flugmálayfirvöld í Kína eru ekki tilbúin til þess að gefa út vottun strax fyrir Boeing 737 MAX þoturnar og aflétta flugbanni vélanna þar í landi.

 síðustu atvik

  2019-01-01 20:20:00