Bjørn Kjos stofnar nýtt flugfélag sem mun fljúga yfir Atlantshafið

- Norse Atlantic Airways mun hefja starfsemi sína í desember

15. mars 2021

|

Frétt skrifuð kl. 20:14

Bjørn Kjos, sem stofnaði Norwegian árið 1993, er stofnandi nýja flugfélagsins, Norse Atlantic Airways

Nýtt norskt flugfélag stefnir á að hefja starfsemi sína síðar á þessu ári og ætlar félagið meðal annars að bjóða upp á flug yfir Atlantshafið til Norður-Ameríku og fylla í það skarð sem Norwegian skilur eftir sig á þeim markaði.

Nýja flugfélagið heitir Norse Atlantic Airways en stofnandi þess er engin annar en Bjørn Kjos sem stofnaði Norwegian árið 1993 en hann hætti sem framkvæmdarstjóri yfir flugfélaginu norska árið 2019.

Kjos mun eiga 15 prósenta hlut í Norse Atlantic Airways en félagið verður að 53 prósent hluta til í eigu Bjorn Tore Larsen sem var einn af stofnendum norska flugfyrirtækisins OSM Aviation en það fyrirtæki mun eiga 10% í nýja flugfélaginu og þá mun Espen Hoiby, framkvæmdarstjóri hjá OSM, Avaition verða fjármálastjóri nýja flugfélagsins.

Taka á leigu Dreamliner-þoturnar sem Norwegian skilaði

Í yfirlýsingu frá Bjorn Tore Larsen segir að nýja flugfélagið sé búið að tryggja sér ótilgreindan fjölda af Dreamliner-þotum á „góðum kjörum“ og ætlar Norse Atlantic Airways að hefja flug til áfangastaða í Bandaríkjunum á borð við New York, Los Angeles og Miami og verður flogið frá London, Osló og París til að byrja með.

Larsen tekur fram að félagið eigi í viðræðum við flugvélaleigur um leigu á þeim Dreamliner-þotum sem Norwegian hefur skilað aftur til eigenda sinna en Norse Atlantic Airways stefnir á að hafa eingöngu Boeing 787 þotur í flotanum.

Stjórn Norse Atlantic Airways samanstendur af stjórnarformönnum frá Norwegian og OSM Aviation

Nú þegar er búið að semja um leigu á níu Dreamliner-þotum og standa yfir viðræður um leigu á þremur til viðbótar og myndi félagið því koma til með að hafa þriðjunginn af þeim fjölda Dreamliner-þotna sem Norwegian hafði.

OSM Aviation hefur þegar auglýst eftir starfsfólki og ætlar félagið að byrja á því að ráða flugfreyjur og flugþjóna en til stendur að áætlunarflug hefjist fyrir desember á þessu ári.

Norwegian tilkynnti um miðjan janúar að félagið ætlaði sér ekki að byrja að fljúga aftur til Norður-Ameríku og ætlaði félagið þess í stað að einblína á innanlandsflug í Skandinavíu og til lykiláfangastaða í Evrópu.

Norwegian hafði 35 Dreamliner-þotur í flotanum sem voru bæði af gerðinni Boeing 787-8 og Boeing 787-9.