Flugfreyja hjá Norwegian dæmd í fangelsi vegna ölvunar

- Taldi sig hafa sennilega fengið sér rósavín í svefni án þess að vita af því

12. apríl 2021

|

Frétt skrifuð kl. 10:06

Flugfreyjan var í áhöfn sem gekkst öll undir áfengispróf á flugvellinum í Þrándheimi á dögunum

Flugfreyja hjá norska flugfélaginu Norwegian hefur verið dæmt til 36 daga fangelisvistar eftir að hún féll á áfengisprófi á flugvellinum í Þrándheimi skömmu fyrir brottför.

Fram kemur að flugfreyjan hafi verið að fagna afmæli föður síns daginn áður en hún átti að mæta til starfa í áætlunarflug frá Þrándheimi til Værnes en öll áhöfnin var látin gangast undir áfengispróf fyrir brottför og kom þá í ljós að áfengismagn upp á 0.37 prómill mældist hjá flugfreyjunni.

Flugfreyjan var samvinnuþýð við yfirheyrslur og viðurkenndi að hafa verið í afmælisveislu daginn áður þar sem hún drakk hálfa flösku af rósavíni með sushi sem hún át en hætti að drekka klukkan 15:00 og gerði ráð fyrir að það væri innan marka þar sem meira en 12 tímar voru í flugið.

Flugfreyjan sagði að hún hefði ekki verið viss um áfengismagnið í líkama sínum er hún vaknaði um morguninn og eina útskýringin sem hún hafði var að sennilega hefði hún vaknað upp um nóttina og fengið sér meira rósavín og drukkið það í svefni án þess að hafa gert sér grein fyrir því.

Flugfreyjan viðurkenndi að hún hefði ekki liðið eins og hún væri í sínu besta formi er hún vaknaði en taldi að ástæðan væri vegna heilsufarsvandamála vegna álags í vinnunni.

Dómstóll í Noregi taldi þá útskýringu vera uppspuna og segir í niðurstöðum dómsins að mjög hæpið sé að viðkomandi geri sér ekki grein fyrir að hann sé að fá sér meira vín ef hann vaknar upp og gengur fram í eldhús til þess að hella meira áfangi í glasið og snýr svo aftur í rúmið.

Lögregluþjónn, sem var viðstaddur er áfengisprófið var tekið, segir að flugfreyjan hafi verið mjög stressuð er áfengisprófið var tekið af áhöfninni sem undirstrikar að hún hafi vitað upp á sig sökina og hafi hún verið önnum kafin við að borða og drekka á meðan próf voru tekin af öðrum í áhöfninni.

Dómari sagði að flugfreyjan hefði átt að vita betur er hún vaknaði um morguninn til þess að mæta til starfa þar sem hennar starf snýst um að sjá um öryggi farþega um borð og vera til takst ef upp kemur neyðartilfelli.

Flugfreyjan hefur starfað í mörg ár fyrir Norwegian en hún ákvað að segja upp störfum í kjölfarið vegna atviksins.