Þotueldsneyti notað áfram til ársins 2050

14. júní 2021

|

Frétt skrifuð kl. 15:02

Airbus telur að hefðbundið þotueldsneyti verði notað áfram í farþegaflug til ársins 2050

Airbus hefur sent frá sér yfirlýsingu og þar á meðal til ríkisstjórna í löndum Evrópu þar sem fram kemur að flugvélaframleiðandinn geri ráð fyrir því að hefðbundið þotueldsneyti verði helsti orkugjafinn fyrir flugvélar með þotuhreyfla að minnsta kosti til ársins 2050.

Flugiðnaðurinn hefur verið undir töluverði pressu að skipta yfir í umhverfisvænni orkugjafa á borð við lífrænt eldsneyti eða raforku en talið er að aðeins um 2% af öllum kolefnaútblæstri í heiminum megi rekja til flugvéla.

Evrópusambandið birti í febrúar á þessu ári skýrslu þar sem fram kemur hvernig draga mætti úr öllum kolefnaútblæstri í fluginu fyrir árið 2050 með þeim tækniframförum sem hafa átt sér stað og auknum umsvifum í framleiðslu á umhverfisvænna eldsneyti.

Airbus tilkynnti í september í fyrra að vonir væru bundnar við að hægt væri að þróa farþegaflugvél sem skildi eftir sig engan kolefnaútblástur sem gæti komið á markað árið 2035 og hafði flugvélaframleiðandinn komið fram með hugmyndir um þrjár útgáfur af orkugjöfum þar sem vetni er aðalundirstaðan.

Airbus telur að vetnisorkugjafi eigi eftir að spila stórt hlutverk í framtíðinni þar sem rafmagnsflugvélar geta enn sem komið er aðeins flogið mjög stuttar flugleiðir og þarf mun lengri tíma til þess að hægt sé að þróa rafmagnstækni sem býður upp á lengri flug fyrir stórar flugvélar.

„Flugvélar sem skilja eftir sig engan kolefnaútblástur verða eingöngu hægt að nota í flug á stuttum flugleiðum frá og með árinu 2035 sem þýðir að almennt farþegaflug mun nánast alfarið reiða sig á hefðbundið þotueldsneyti líkt og í dag að minnsta kosti til ársins 2050, sérstaklega á lengri flugleiðum“, segir í tilkynningu frá Airbus.

Airbus stefnir á að hefja tilraunir með umhverfisvænna þotueldsneyti fyrir Airbus A320 þotuna og gæti farþegaflug með endurnýtanlegum orkugjafa hafist í náinni framtíð til ársins 2050 en eftir það gætu A320 þotur farið að fljúga mögulega fyrir vetni.

Smærri þotur á borð við Airbus A220 gætu notað raforku, vetni eða endurnýtanleg eldsneyti frá og með árinu 2040 og telur Airbus að litlar flugvélar með skrúfumótor, sem taka 50 til 100 manns, gætu alfarið farið að fljúga fyrir vetni á fjórða áratug þessarar aldar.