Hafa flogið 18.000 flugferðir með nánast tómar flugvélar

- Fljúga með örfáa farþega til þess að halda lendingarplássunum

9. janúar 2022

|

Frétt skrifuð kl. 20:41

Airbus A320 þota frá Lufthansa í lendingu á Frankfurt-flugvelli í Þýskalandi

Lufthansa og dótturfélag Lufthansa Group hafa til samans flogið 18.000 óþarfa flugferðir með nánast tómar flugvélar það sem af er vetri í þeim tilgangi að halda lendingarplássum sínum á flugvöllum.

Vegna heimsfaraldursins hafa flest flugfélög lent í því sl. misseri að þurfa að aflýsa flugferðum vegna dræmrar eftirspurnar í farþegaflugi vegna ferðatakmarkana en margir flugvellir hafa strangar reglugerðir er kemur að rétti flugfélaga til þess að viðhalda plássum á flugvöllum.

Margir flugvellir hafa ekki breytt út af vananum í þeim efnum eða gert undantekningar sem hefur valdið því að sum flugfélög hafa ákveðið að fljúga því nánast tómum flugvélum með örfáa og stundum engar farþega um borð í stað þess að taka hættu á að missa plássin.

Fram kemur að Brussels Airlines, dótturfélag Lufthansa Group, hafi í vetur flogið yfir 3.000 óþarfa flugferðir með örfáa farþega um borð sem félagið hefði annars aflýst ef ekki væri fyrir að halda lendingarplássunum á flugvöllunum.

Þetta hefur valdið því að ríkisstjórn Belgíu hefur sent erindi til Evrópusambandsins þar sem hvatt er til þess að endurskoða reglugerðir er varða notkun lendingarplássa í þeim tilgangi að draga úr óþarfa flugferðum með tilheyrandi mengun og kolefnaútblæstri.

Fram kemur að farið sé fram á að flugfélög verði að nýta að minnsta kosti 80% af flugtaks- og lendingarplássum sínum á flugvöllum í Evrópu ef þau vilja ekki eiga á hættu að missa plássin. Við upphaf faraldursins var krafan lækkuð niður í 50 prósent hlutfall en það er samt sem áður langt yfir þann fjölda flugferða sem mörg flugfélög hafa þurft að fljúga þar sem eftirspurnin hefur enn ekki náð sér á strik vegna COVID-19.

Georges Gilginet, ferðamálaráðherra Belgíu, hefur skrifað bréf til Adina Valean, samgöngumálafulltrúa Evrópusambandsins, með erindi varðandi málið þar sem fram kemur að reglugerðin og krafan varðandi afnot af plássum á flugvöllum væri alls ekki í samræmi við aðstæðurnar í dag út frá efnahagslegu og visfræðilegu sjónarmiði og þyrfi að slaka á kröfunum enn frekar til þess að veita flugfélögum enn meiri sveiganleika sem þau þurfa á að halda.

Lufthansa telur að félagið eigi eftir að þurfa að aflýsa 33.000 flugferðum fyrir lok mars vegna samdráttar í bókunum á flugsætum í tengslum við Ómikron-afbrigðisins.