Flugmaður í 1 árs fangelsi fyrir að falsa gögn í atvinnuumsókn

- Laug til um flugtímafjölda til að fá starf hjá BA CityFlyer

4. apríl 2022

|

Frétt skrifuð kl. 07:07

Flugmaðurinn flaug meðal annars Embraer-þotum fyrir breska flugfélagið BA CityFlyer

49 ára breskur flugmaður, Craig Butfoy að nafni, var á dögunum dæmdur í eins árs fangelsi í Bretlandi fyrir að hafa logið til um flugreynslu sína og falsað gögn yfir flugtíma en flugmaðurinn hafði starfað um tveggja ára skeið sem atvinnuflugmaður þangað til að það komst upp um hann.

Fram kemur að flugmaðurinn hefði falsað tímafjölda í flugtímabók sinni fyrir atvinnuumsókn þar sem fram kom að hann hefði 1.610 flugtíma að baki sem flugstjóri á Embraer-þotu og þá var hann dæmdur fyrir að hafa falsað gögn sem sýndu fram á þjálfunarferil hans fyrir atvinnuviðtal hjá flugfélaginu CityFlyer sem er dótturfélag British Airways.

Flugmaðurinn starfaði hjá BA CityFlyer frá því í apríl árið 2016 fram til mars árið 2018 og flaug hann meðal annars á London City flugvöllinn en þar á undan starfaði hann sem flugmaður hjá Stobart Air sem var þá í eigu Aer Lingus.

Samkvæmt breska dagblaðinu The Times kemur fram að grunsemdir vöknuðu meðal yfirmanna BA CityFlyer er þeir heyrðu af atviki þar sem flugmaðurinn var næstum því búinn að ýta á tiltekinn takka sem enginn flugmaður hefði ýtt á án þess að tilgreint er nánar hvaða takka var um að ræða en það atviki átti sér stað á jörðu niðri.

Málið rataði inn á borð hjá bresku flugmálastjórninni (CAA) sem hóf rannsókn á málinu og fór að grafast fyrir um bakgrunn flugmannsins og kom þá í ljós að hann hefði breytt upplýsingum um þá flugtíma sem hann átti að hafa haft að baki hjá öðrum vinnuveitanda sem hefur Embraer 190 þotur í flota sínum líkt og BA CityFlyer. Þá segir að hann hefði einnig logið til um að hann hefði haft einkaflugmannsskírteini í gildi síðan 1998.

Fréttamiðillinn The Business Insider hafði samband við British Airways sem sagði að viðkomandi flugmaður væri mjög hæfur og hefði öll skírteini í gildi án athugasemda og væri málið tilkomið vegna rangra upplýsinga og misskilnings sem höfðu borist með umsókninni.

„Öryggi farþega okkar og áhafnar er ávallt í fyrirrúmi og flugmaðurinn, sem var fullkomnlega hæfur, var vikið úr starfi og rannsókn hófst um leið og BA CityFlyer komst að því að það væri misræmi í umsókninni“, segir talsmaður British Airways sem bendir á að aldrei hefði verið nein hætta á ferðum gagnvart farþegum.

Jonathan Spence hjá bresku flugmálastjórninni segir að atvikum sem þessum sé tekið mjög alvarlega. „Heiðarleiki meðal flugmanna er það sem öryggi í flugi snýst um og við grípum alltaf til aðgerða þegar þörf krefur til að viðhalda því“, segir Spence.

Butfoy var dæmdur sl. mánudag í 12 mánaða fangelsi við dómshúsið Snaresbrook Crown Court í London.