Flugstjóri strunsaði frá borði eftir deilur við flugmanninn

- Snéri við að brottfararhliði rétt fyrir flugtak frá Washington til San Francisco

22. júlí 2022

|

Frétt skrifuð kl. 14:12

Atvikið átti sér stað á Dulles-flugvellinum í Washington sl. mánudag

Seinkun varð á flugi Alaska Airlines frá Washington D.C. til San Francisco sl. mánudag eftir að flugstjóri vélarinnar yfirgaf stjórnklefann þar sem honum og aðstoðarflugmanninum kom ekki saman.

Flugmennirnir tveir voru að undirbúa brottför um borð í þotu af gerðinni Airbus A320 á Dulles-flugvellinum þegar atvikið átti sér stað.

Fram kemur að flugvélin hafi verið byrjuð að aka í átt að flugbrautinni þegar annar flugmannanna ávarpar farþega í kallkerfinu og tilkynnir þeim að hann ætli að snúa flugvélinni við og leggja henni aftur að landgangnum þar sem það fer ekki vel á milli þeirra fram í stjórnklefanum.

„Eftir tveggja tíma seinkun á flugi AS1080 þá voru flugmennirnir að snúa við að hliðinu og fór annar þeirra frá borði þar sem þeim samdi ekki nógu vel - Ekkert smá ófagmannlegt - Flugfreyjurnar eru að reyna að gera sitt besta og hafa ekki hugmynd um hvað er í gangi“, skrifaði einn farþeginn á Twitter aðganginn sinn.

Að sögn farþega þá hafði þegar orðið töluverð seinkun á fluginu vegna þrumuveðurs í nágrenni Washington en þeir þurftu að bíða í meira en tvær klukkustundir á meðan Alaska Airlines reyndi að finna annan flugstjóra til þess að koma og fljúga vélinni.

Upphaflega átti flugvélin að fara í loftið frá Dulles-flugvellinum klukkan 16:10 að staðartíma en fór ekki í loftið fyrr en klukkan 19:30 og lenti í San Francisco tveimur og hálfri klukkustund á eftir áætlun.

Að sögn eins farþega um borð þá var flugstjórinn „rjúkandi“ illur er hann yfirgaf flugvélina en ekki er vitað hvað gekk á milli hans og hins flugmannsins.

Enn annar farþeginn tjáði sig á samfélagsmiðlinum Reddit þar sem hann segir að mikil fagnaðarlæti hafi brutist út meðal farþega þegar nýr flugstjóri birtist loksins til þess að fljúga vélinni.

Flugmenn hjá Alaska Airlines hafa átt í kjaradeilum við stjórn flugfélagsins sl. eitt ár en flugmenn félagsins hafa lengi kvartað yfir því að þeir séu látnir vinna allt of mikið og njóti ekki þess sveigjanleika sem flugmenn hjá öðrum flugfélögum njóti er kemur að vaktafyrirkomulagi.

Flugstjórinn gengur í gegnum flugstöðina á Dulles-flugvelli eftir að hafa yfirgefið flugvélina:

continued, @AlaskaAir there goes your pro pilot, off into the sunset pic.twitter.com/Yrw4VnvzF2

— CDC MUSIC FACTORY (@iwillbeamyouup) July 18, 2022