Qantas biður yfirmenn að hlaða ferðatöskum í flugvélar

- Stjórnarmeðlimir félagsins slást í hópinn í hlaðdeildinni

8. ágúst 2022

|

Frétt skrifuð kl. 08:56

Stjórnarmeðlimir Qantas þurfa að fara í hlaðdeildina að minnsta kosti fimm daga vikunnar, næstu þrjá mánuðina

Stjórnarmeðlimir hjá ástralska flugfélagið Qantas þurfa sennilega á næstu dögum og vikum að taka að sér að hlaða ferðatöskum um borð í flugvélar félagsins en stjórn Qantas hefur beðið þá og aðra yfirmenn að taka að sér nýtt samvinnuverkefni sem snýst um að þeir taki að sér ýmiss flugvallarstörf í að minnsta kosti fimm daga vikunnar, næstu þrjá mánuðina.

Margir af yfirmönnum Qantas hafa sinnt flugvallarstörfum á árum áður þegar þeir stigu sín fyrstu skref hjá flugfélaginu en fæstir áttu þó von á því að þeir yrðu beðnir um að hlaupa í þau störf í dag þegar þeir eru komnir í stjórn félagsins.

Í skilaboðum til stjórnarformanna sem Qantas sendi frá sér kemur fram að félagið þurfi að minnsta kosti 100 yfirmenn í hinu fjölbreyttu störf á flugvöllum víða um Ástralíu og er tekið fram að á meðan þeir sinna þeim störfum þurfi þeir ekki að sinna stjórnunarstörfum á sama tíma.

Colin Hughes, flugrekstarstjóri hjá Qantas, segir að þeir muni fá vaktafyrirkomulag í hendur í hlaðdeildinni og muni þeir sjá um að koma farangri um borð, keyra flugvallarökutæki sem þjónustu flugvélar Qantas og koma farangri frá borði inn í farangursflokkunarsali.

Sögðu upp 1.700 flugvallarstarfsmönnum í heimsfaraldrinum

Qantas sagði upp um 1.700 starfsmönnum í flugvallarþjónustudeild sinni í heimsfaraldrinum en dómstóll í Ástralíu komst að þeirri niðurstöðu á sínum tíma að þær uppsagnir hafi brotið í bága við reglugerðir um starfsmannamál en Qantas hefur áfrýjað þeim úrskurði.

Ástandið á flugvöllum í Ástralíu hefur verið álíka slæmt og í Evrópu

Orðstýr Qantas sem eitt áreiðanlegasta flugfélag Ástralíu og uppáhaldsflugfélag meðal Ástrala hefur orðið fyrir miklum skaða sl. mánuði þar sem flugvélar hafa skilið farangur eftir, biðtími eftir að ná á þjónustufulltrúa í síma telur margar klukkustundir auk þess sem stundvísi félagsins er í molum.

Talsmaður Qantas segir að fara þurfi mörg ár aftur í tímann til að finna eins slæma tíma á atvinnumarkaðnum þar sem fjöldi kórónaveirusmita er enn í hæstu hæðum í landinu á sama tíma og eftirspurn eftir flugi er komin á fullt skrið.

Fram kemur að í júní og júlí hafi 9 af hverjum 1.000 ferðatöskum glatast hjá Qantas, farið á ranga áfangastaði eða ekki skilað sér sem er óvenju hátt hlutfall samanborið við 3 af hverjum 1.000 hjá samkeppnisflugfélaginu Virgin Australía en fram kemur að þessi tala hafi náð 20 ferðatöskum hjá Qantas um síðastliðna páska.

Bæði Qantas og Virgin Australia hafa þurft að aflýsta flugferðum og draga saman flugáætlunina vegna skorts á starfsfólki og óvenju hás hlutfalls veikindadaga meðal starfsmanna.