Air India herðir kröfur um útlit meðal áhafna

- Flugfreyjur og flugþjónar mega ekki hafa skallabletti eða grá hár

27. nóvember 2022

|

Frétt skrifuð kl. 22:28

Flugfreyjur og flugþjónar hjá Air India

Air India hefur kynnt nýjar kröfur sem flugfreyjur og flugþjónar flugfélagsins indverska þurfa að uppfylla ef þau ætla að starfa áfram hjá félaginu.

Tata Group, nýtt móðurfélag Air India, segir að flugfélagið hafi ekki verið nægileg duglegt við að uppfylla kröfur meðal starfsfólks um borð í flugvélunum og hafi ímynd félagsins setið á hakanum um nokkurt skeið.

Meðal þeirra skilyrða sem farið er fram á varða snyrtimennsku og útlit og segir að flugfreyjur og flugþjónar skulu ekki vera með neina skallabletti á höfði og ekki nein grá hár sýnileg.

Fram kemur að flugþjónar skulu annað hvort fela skallabletti eða raka sig skollótta samkvæmt nýjum viðmiðunarreglum og þá segir að grá hár verði ekki liðin héðan í frá sem á bæði við flugfreyjur og flugþjóna sem verða núna að fela grá hár með háralit.

Fyrir flugfreyjur þá er ekki sama hvaða háralit þau velja þar sem ljóst hár er bannað og er bent á viðeigandi litakort þar sem tíundaðir eru þeir háralitir sem í boði eru.

Þá skulu flugfreyjur, sem kjósa að hafa hárið í hnút, gæta þess að hnúturinn sé ekki of stór auk þess sem frekari fyrirmæli um hárgreiðslu hafa verið gefin út.

Þá verða flugfreyjur og flugþjónar eingöngu að vera með einfalda hringi á fingrum sem eru annaðhvort úr silfri eða gulli og mega hringarnir ekki innihalda neina steina og vera lausir við merki eða einhverja yfirgnæfandi hönnun.

Athygli vekur að á meðan mörg flugfélög hafa slakað á kröfum um klæðaburð meðal flugfreyja og flugfreyja þá hefur Air India hert kröfur varðandi útlit og fatnað.

Þetta er ekki í fyrsta skipti sem Air India kemst í fréttirnar varðandi kröfur fyrir flugfreyjur og flugþjóna en árið 2013 gaf flugfélagið frá sér yfirlýsingu þar sem flugliðar höfðu 3 mánuði til þess að koma sér í form og var þeim gefin sá kostur að taka sér frí í 12 vikur til að koma sér í form og mæta til baka þegar að árangri hafi verið náð.

"Þeir sem hafa ekki náð að koma sér í form eftir þrjá mánuði munu ekki fá að starfa meira um borð í vélum Air India og verður þeim boðið starf á jörðu niðri", sagði talsmaður Air India fyrir níu árum síðan.