Flugmannstaska olli því að þota læstist í handbremsu í lendingu

- Talið að beisli á flugtösku flugstjórans hafi krækst í „parking brake“ takkann

1. desember 2022

|

Frétt skrifuð kl. 15:35

Atvikið átti sér stað í lendingu á flugvellinum í borginni Irkutsk í Rússlandi þann 2. nóvember síðastliðinn

Talið er að orsök þess að fjögur dekk sprungu í lendingu á farþegaþota af gerðinni Airbus A320 í Rússlandi í byrjun nóvember hafi verið sú að annar flugmaður þotunnar setti flugtöskuna sína ofan á stjórnborð og að beisli töskunnar hafi óvart náð að krækjast í handbremsu vélarinnar.

Upplýsingar varðandi orsök atviksins kemur fram í skilaboðum sem lekið var í fjölmiðla en skilaboðin komu frá Igor Bocharov, öryggisfulltrúa hjá rússneska flugfélaginu S7 Airlines, og birtust skilaboðin á Telegram-síðu Aviatorschina sem reglulega birtir upplýsingar sem leka frá rússneska flugiðnaðinum.

Atvikið átti sér stað hinsvegar hjá flugfélaginu Ural Airlines og var um að ræða áætlunarflug frá borginni Dushanbe í Tadsíkistan til Irkutsk í Rússlandi þann 2. nóvember síðastliðinn.

Samkvæmt upplýsingum á annar flugmaðurinn að hafa sett flugtöskuna sína á stjórnborðið á milli flugmannanna sem á ensku nefnist „middle console“ en þar er snúningstakka að finna sem setur flugvélina í bremsu t.a.m. þegar hún er komin að landgangi.

Skjáskot úr öryggismyndavél

Talið er að beisli töskunnar hafi krækst utan um takkann og virkjað bremsuna þegar þotan var í 40.000 feta hæð og kemur fram að flugmennirnir hafi nokkrum sinnum virkjað og aftengt bremsuna þar til að „parking brake“ ljósið var farið.

Hinsvegar hafi flugmennirnir ekki athugað stöðuna á þrýstingnum á vökvakerfinu sem virkjar bremsurnar á hjólabúnaðinum og hefðu þeir átt að fara yfir viðeigandi gátlista varðandi þær aðstæður.

Bremsuljósið kom aftur á þegar flugvélin var í að flugi í 1.400 feta hæð og tóku flugmennirnir eftir að þrýstingur var á kerfinu en aðhöfðust ekkert frekar og héldu aðfluginu áfram.

Flugvélin lenti í Irkutsk en samstundist læstust allar bremsur með þeim afleiðingum að það sprakk á öllum fjórum hjólunum á aðalhjólabúnaði vélarinnar.

Það tók 12 klukkustundir að fjarlægja þotuna af brautinni og kemur fram að skemmdir hafi orðið á yfirlagi brautarinnar og varð því að beina 14 öðrum flugvélum til annarra flugvalla.

Í yfirlýsingu frá Ural Airlines kemur fram að atvikið hafi orskast vegna bilunnar í bremsubúnaði. Þá segir á vefsíðunni Aviatorschina að það hafi verið flugstjórinn sem hafi sett töskuna á stjórnborðið og hafi hann yfirgefið flugfélagið í kjölfar atviksins.