Rekstur Flyr hangir á bláþræði - Aflýstu öllu flugi í dag

- Hluthafar hættu við frekari fjárfestingar og lausafé næstum því á þrotum

31. janúar 2023

|

Frétt skrifuð kl. 15:02

Boeing 737-800 þota frá Flyr á Gardermoen-flugvellinum í Osló

Norska flugfélagið Flyr er sagt vera á barmi gjaldþrots og hefur flugfélagið lýst því yfir að reksturinn sé í mjög alvarlegri stöðu þar sem ekki tókst að verða út um það fé sem vonast var til.

Flyr var stofnað í ágúst árið 2020 og hóf félagið áætlunarflug í júní árið 2021 og hefur félagið því aðeins verið starfrækt í eitt og hálft ár.

Stjórn Flyr er að meta stöðuna og verður tekin ákvörðun um hvort leitast verður leiða til að finna aðrar lausnir í stöðunni eða hvort að besti kosturinn sé að hætta starfsemi og lýsa yfir gjaldþroti.

Flugfélagið gerði í gær grein fyrir ástandinu við kauphöllina í Osló og flaug félagið í gær til Alicante, Gran Canaria og til Malaga en í dag, þriðjudag, hafa engar flugferðir verið farnar og biður félagið farþega um að fygljast með þróun mála á vefsíðu félagsins.

Fram kemur að vegna „ástandsins á markaðnum“ og vegna áframhaldandi óvissu í ferðamannaiðnaðinum hafa hluthafar dregið sig frá frekari fjárfestingum til Flyr þrátt fyrir þau áform sem félagið hefur gert er kemur að leigu á fleiri flugvélum og aukinni eftirspurn í farmiðasölu.

Flyr hefur tólf Boeing 737 þotur í flotanum

Stjórn flugfélagsins segir að lausafjárstaða félagsins sé mjög tæp og ætlar stjórnin að reyna finna aðrar leiðir sem eru í boði til þess að koma með fjármagn inn í reksturinn og tryggja áframhaldandi flugrekstur en tekið er fram að ekki sé nein trygging fyrir því að hægt verði að finna aðra fjárfesta með svo skömmum fyrirvara.

Í síðustu viku tilkynnti Flyr um tvo leigusamninga sem gerðir hafa verið upp á 1.6 milljarð króna en annar þeirra er upp á 1.2 milljarð og er um viljayfirlýsingu sem er háður frekar fjármögnun.

Flyr lýsti því yfir í nóvember sl. að vonir stæðu til að hægt væri að safna 7.5 milljörðum króna til rekstursins til þess að þrauka veturinn en þau áform gengu ekki eftir. Í staðinn náði félagið að fá fjármagn upp á 3.5 milljarða með hlutafjárútboði.

Kringum áramótin tilkynnti Flyr að félagið hefði sótt um leyfi til samgönguráðuneytis Bandaríkjanna til þess að hefja leiguflug vestur um haf í nóvember 2023 og þá hefði félagið hafið viðræður fyrir jólin vegna leigu á sex þotum fyrir sumarið.

Flyr hefur tólf þotur í flotanum í dag, sex af gerðinni Boeing 737-800 og sex af gerðinni Boeing 737 MAX 8 og hefur félagið flogið til 31 áfangastaða í Evrópu.